「東網巨星最愛」母親節篇 趙頌茹最愛論盡媽咪
星期日就是母親節，為獻給偉大的母親，《東網巨星》特意炮製「巨星最愛－母親節篇」，由藝人親訴對母親最真最誠的心聲。已為媽咪級的趙頌茹（阿Yu），趁機答謝母親對她的養育之恩、「巨聲幫」羅孝勇更認為媽咪是他頭號偶像；導演陳果則道出母親影響了其執導生涯，字字有淚！
趙頌茹
我心目中最愛就係我媽咪，我要多謝佢三十幾年嘅養育之恩，最有印象係我好細個時慶祝生日，請咗一大班朋友仔嚟開Party，媽咪竟然將為我預備嘅生日蛋糕跌咗落地，所以我成日會用嚟取笑媽咪，將來我再慶祝生日，記住唔好再將生日蛋糕跌落地下。
羅孝勇
我最愛係媽咪，由細到大都非常照顧我，讀書時有咩困難都帶我去搵補習老師，或者音樂方面畀好多靈感我，到我做歌手之後，佢成日都會Check住Video同新歌，佢係我No.1 Fans，我都係佢No.1 Fans。
AGA
我嘅最愛係媽媽，因為佢無條件咁對我付出，由入行到依家都畀咗好多支持同鼓勵我，所以我最愛係佢！
陳果
最愛嘅人梗係媽咪啦！佢咁辛苦！我哋中國人平時含蓄啲，對住女友會講，對住媽咪就好少講，借呢個機會就啱喇！媽咪，我愛你！我細個時媽咪成日打我，因為我細個太百厭啫！最難得係我做電影咁多年，屋企人都好支持我，當年我點解拍《榴槤飄飄》呢？都係因為媽咪成日逼我食榴槤，令我覺得榴槤真係好嘢！所以拍咗呢套戲出嚟，講你都唔信！