謝安琪暴乳狂奔群情胸湧

無綫新劇《殭》前晚於長沙灣拍攝外景，劇情講述Kay及Grace被關禮傑捉走，鄭嘉穎前來營救，嘉穎更與關禮傑打起上來。因拍此劇傳出「父女戀」的鄭嘉穎與Grace，本應是劇集最吸睛之處，不過前晚Kay竟然奇招突圍，赤腳跑街噱頭十足之餘，穿上白色羊毛長袖衫的她雖然包到實，但緊身程度令其雙峰表露無遺，跑街時雙峰亦跟住步伐齊齊跌蕩，畫面震撼兼養眼，旋即惹來網民評論，對於已為人妻兼人母的Kay再度發育嘖嘖稱奇，成為熱話。Kay呢招「突圍而出」成功揮低一對緋聞男女，令身為女主角的她贏番次。

黐膠紙打底

前晚劇情講述Kay為逃亡而赤腳跑街，她笑言早前已跑過多區：「都跑咗四、五個區o架啦，連沙頭角都跑埋！」曾試過跑爆腳甲的她，今次醒目地在腳底貼上膠紙，不過赤腳跑街亦不夠胸前偉大惹人注目。對於網民激讚她的身材，Kay表示感謝，又指早前在荷蘭拍外景時天氣很冷：「喺嗰度成日食薯仔、薯條，又飲奶同食芝士！肥咗十幾磅返嚟！大家咁激讚我身材，真係不敢當。」她指辛苦工作亦會獎勵自己，故拍攝時不時帶備食物「跟身」。Kay又表示拍攝此劇全情投入：「身材係其次，最重要keep住個心態同狀態。」

謝安琪側身站在嘉穎身旁，身材玲瓏浮凸。	謝安琪在腳底黐膠紙，以防受傷。	關禮傑（左）與鄭嘉穎街頭對戰。

呻無覺好瞓

Kay在荷蘭拍外景返港後，依然做到無停手，繼續拍劇期間飛到菲律賓出席活動，又要為顧嘉煇演唱會作綵排，直言良久未有試過連續睡超過四小時。未有時間見仔仔的她笑言，仔仔有自己的生活圈子，不用她擔心。老公張繼聰在她逗留荷蘭期間笑她「夾帶私逃」，只餘下二千元給他，Kay笑說：「佢睇得太多《古惑仔》啦，覺得去荷蘭就係走咗唔返嚟！」

對於同劇的陳凱琳與鄭嘉穎被傳撻着，Kay被問在荷蘭拍外景時有否察覺二人有「景轟」？她說：「我對眼天生睇唔到人哋拍拖o架喎，我又唔會去八卦，你問番主人家啦！（鄭嘉穎春風得意？）佢不嬲都好得意o架！」

文：影視組