柏豪安撫粉絲 搞足4粒鐘
周柏豪日前到內地出席戶外簽唱會，由於人群愈聚愈多逼爆整個場地，有歌迷冒險企出馬路，驚動公安到場，為免出現「人踩人」悲劇，公安勒令腰斬活動，疼錫歌迷的柏豪即轉往大會辦公室為歌迷簽名「補飛」。
「型男」周柏豪近年開拓內地市場，舉行多場內地巡迴簽唱會，每到之處必吸引數百歌迷「朝聖」，日前柏豪出席順德舉行的簽唱會，舞台設於戶外會場中央，台下企滿歌迷，期間圍觀人數愈來愈多，有過百歌迷冒被車撞企在馬路上，驚動公安到場維持秩序，大會亦開咪呼籲歌迷切忌向前撞，為免發生人踩人事件，最終活動被公安腰斬。
女歌迷錫車窗
見慣大場面的柏豪憶述當日情況：「我唱唱吓歌，大會已經叫群眾疏散，點知人數愈嚟愈多，最後公安話場面太危險要求腰斬。」柏豪擔心歌迷失望，與大會商量改往大會辦公室為歌迷簽名，他說：「因為辦公室空間有限，所以分批上去簽名，都簽咗四個鐘，都知情況難控制。」問到會否被腰斬嚇一跳？柏豪說：「冇，因為唔係第一次，只要有頭排歌迷跌倒就會引起混亂，都明白公安嘅決定。」他坦言車駛到會場時，已被數十歌迷包圍：「啲歌迷變晒三文治圍住架車，有女歌迷仲即時錫車窗添。」
文：音樂組