羅鈞滿背張文采鎅索空姐

現年31歲的羅鈞滿於2009年參加無綫藝員訓練班入行，雖在唱歌比賽《星夢傳奇》中躋身五強後，獲安排主唱多首電視劇主題曲，又擔任《勁歌金曲》主持，但星途依然麻麻。觀其代表作，可說是與無綫新聞小花張文采拍拖，不過惹來不少宅男眼紅。與女友拍拖四年的他在前年的訪問中直言，視女友為結婚對象。

極速人肉起底

不過羅鈞滿日前被本報獨家拍得在尖沙咀一間酒吧夜蒲兼連獵兩女，更與穿露肩裙的長髮女一號咬耳仔傾偈，期間更有捉手仔等拉扯動作，狀甚親暱！之後更出現了長髮女二號，一王兩后齊齊飲酒。

無綫新聞小花張文采是網民女神，粉絲不值羅鈞滿所為而紛紛鬧爆。（資料圖片）	羅鈞滿日前於酒吧與Sylvia拉拉扯扯又情深對望傾偈。	放大圖片

張文采一向是網絡女神，羅鈞滿有女神都不夠，仍背女友秘溝索女，即辣一眾張文采粉絲，驚動網上起底組極速人肉搜尋起長髮女底。發現她英文名叫Sylvia Lam，其instagram（ig）有一萬三千多名追隨者，可算是ig紅人。

疑似做空姐的Sylvia因工作關係經常環遊世界，除了上載風景照，亦經常晒長腿和甜美笑容。勁有鄰家女孩feel的她亦有狂野一面，在萬聖節時她與朋友變裝扮性感小野貓，去旅行又會大晒索爆比堅尼照。身材均勻、胸腰腿有齊，加上空姐一職，集齊令男士流晒口水的特徵，要「收兵」絕冇難度。今次不止是兩女人之爭，更是空姐鬥主播，兩職業之爭！

死撐餐廳非酒吧

Sylvia發現遭人起底，即時將原本公開的ig戶口變為私密帳號，要「追隨」她才能檢視其照片。昨日男主角羅鈞滿在將軍澳電視城開工，即被傳媒追訪，他否認在夜場鎅女，更死撐當晚身處並非酒吧而是餐廳。他說：「同同事食飯咁啱撞到以前讀書嘅師弟，嗰兩個女仔係師弟嘅女朋友。（玩到好熱情喎！）冇！我雙手插喺袋o架。」問到女友張文采有否詐型？他謂：「冇，佢好信任我。（女友呷醋？）唔會呷醋，佢知道相片好多只係事實嘅一部分，自己都好少去蒲。」

不少藝人有負面新聞爆出都會被放入雪櫃，但已一段時間沒拍劇的羅鈞滿透露下月開劇，亦會拍攝節目《搵食飯團》。問工作量增加會否較為安心？他說：「都會，最好梗係日日都好忙好多工作喇！公司都畀好多機會我。」

文：東網組