楊愛瑾開心得滯嚟唔切反應
藝人楊愛瑾昨日出席活動時否認已與男友郭永淳註冊的傳聞，但就大方承認男友已向她求婚，坦言令她很surprise兼不懂反應，對方有下跪，總之基本要做都做齊。她又爆表示不論男友做甚麼都覺得浪漫，她都喜歡，不用花巧，即使送她戒指糖都開心。
早前有傳楊愛瑾（Miki）跟男友、永安集團太子郭永淳已於冰島註冊結婚，她昨日出席活動時否認已當郭太：「唔係，仲係楊小姐。（已經冰島註冊？）我只係去冰島同芬蘭旅行，睇北極光同埋慶祝生日。（男友求婚？）求，芬蘭求。（北極光下求？）北極光淨係夜晚先有，我係冰天雪地下，落住雪，好surprise，太快，唔切反應，好開心，呢個地方我諗去好耐。（浪漫？）其實佢點我都覺得浪漫。不過我冇喊，好得意，平時我好易感動好易喊。佢有跪下，基本都做晒，佢唔使花巧，做咩我都鍾意。（求婚戒指幾卡？）呢唔係最重要，就算戒指糖我都開心，最重要係兩個人一齊分享生活事，平平淡淡相處，開心最重要。」
擺酒簡單一次就夠
問到婚期？Miki說：「先返未有schedule，可能下年，好多朋友恭喜我，幫我諗埋時間地點，應該下年但唔會係年頭。（香港搞？）未知，要睇屋企人點。如果畀我揀會想少人去、好遠地方，唔知可唔可以，結婚除兩個人仲要顧埋屋企人，要溝通完先知點。（擺幾次？）我鍾意簡單一次夠晒開心enjoy就夠。（姐妹團定未？）走唔甩，我confirm晒時間地點佢就會自己報名。（郭永淳前妻Connie話祝福你？）我有睇報紙，我都祝福希望所有人都身體健康。」
JC生日畀男友搞喊
同場「警鐘胸」女模Jessica C.（JC）於本月18日生日，問到生日怎樣慶祝？她說：「正日日留屋企同Andy（男友安志杰）二人世界，佢煮早餐畀我食，送條心形吊墜頸鏈畀我，佢送畀我時我感動到喊。（第一次收男友送首飾？）唔係，不過呢次好特別，係Andy親自去挑選同買畀我，一個男仔咁樣為我，佢知我鍾意心心，好有我心，好sweet。佢應承會同我去馬爾代夫，睇吓遲幾時有時間就去。（生日想收鑽戒？）我唔會期望呢，順其自然。」
文：名人組