呂珊吸3歲歌迷
呂珊再度降臨伊館，更與管弦樂團和中樂團合作，務求做到中西合璧，為觀眾帶來新的聽覺效果，珊姐又講到今次的演唱會吸引了很多「新血」，有很多年輕人主動買飛支持。
事隔一年，樂壇前輩呂珊將於五月頭再次於伊館舉行《弦來最愛靚聲天后呂珊×管弦樂演唱會2015》，珊姐表示與去年相比，今次的演唱會會有更多的新鮮感：「上次就以唱歌為主，比較多種類，舞台上又有好多新設計，但今次就會比較着重番音樂方面。」
珊姐又透露今次會與管弦樂團和中樂團合作，希望做到中西合璧的效果。雖然音樂上會有大突破，但呂珊直言最可惜是要犧牲與觀眾親密接觸的機會：「因為場地所限，樂團又會佔啲位，所以握手位會比以前少，依家都仲傾緊，希望可以就到。」
向梅姐致敬
而音樂方面，珊姐表示中、英文和國語歌都會唱，亦會精心挑選流行曲獻唱，她又表示：「一啲向歌手致敬嘅歌一定會唱，因為自己都好鍾意，係大家一齊成長，好似羅文、梅艷芳。」珊姐又笑說今次最開心是觀眾的層面比去年更廣：「好多人以為我唱金曲，有一定年紀嘅人先嚟睇，但今次多咗年輕人，有個朋友嘅小朋友得三歲，都指住部電視話認得我想嚟睇。」
拍劇又排練
談到珊姐最近正開拍兩套新劇，會否沒時間練歌？珊姐直言：「當初我都有擔心，二月決定五月開騷，但嗰時又啱啱接咗劇拍，電視係團體合作，但歌又唔可以唔練，初初都驚會攰，依家就覺得好充實。」她又講到在某幾個練歌的大日子都要和導演請假。
文：音樂組
攝：黎志輝