方力申笑嘉欣咀得唔Pro
闊別無綫10年的方力申回歸參演劇集，並與「女神」鍾嘉欣演情侶，且受對方感染拍親熱戲時要飲酒壯膽，笑指嘉欣完全不擅長演該類戲份，故埋位時他自動波點到即止，將翻天覆地演變為蜻蜓點水式交代！
自10年前一套《甜酸爺爺》後，方力申便暫別無綫，及後轉戰內地拍劇，最近回歸接拍劇集《華麗轉身》，夥拍「女神」鍾嘉欣及兩位具分量前輩汪明荃、劉松仁，方力申坦言再拍攝無綫劇的確唔慣，基於早年內地發展，已習慣了另一種模式，故拍攝初期也要花時間適應。
劇中飾演賤男才子的方力申與嘉欣有感情線，明知神女有心卻偏偏利用其弱點，對於嘉欣經常演懦弱角色，方力申亦大表認同：「佢個樣易呃！」談到二人不乏親熱戲，方力申就認為嘉欣不擅長演該類戲份，由於受對方緊張情緒影響下，他也要於拍攝前飲酒壯膽：「咁佢都有飲，但飲少少就面紅，仲話心跳好快，問我點算，我咪叫佢飲多啲水囉！好得意，同佢好似識好耐咁，但拍親熱戲又有啲尷尬，佢有少少避忌我，感覺係不如唔好錫咁多，咁好多嘢可長可短，拍出感覺就OK，劇本係寫到翻天覆地，我就將佢變成蜻蜓點水，喺動作上翻天覆地！（佢多謝你？）咁我又未必咁想錫耐啲，都尷尬！（因為名草有主？）為咗出嚟效果啫！」
同阿姐爭唱主題曲
對於與出名準時的阿姐合作，方力申直言緊張，還會提早到拍攝場地：「喺化妝間阿姐搞掂，即使我條眉未畫晒都出去先，側一邊臉都拍咗先。（有冇指導你演戲？）都有提點，其實佢好易相處，好易氹，讚吓佢唱歌好聽咁，今次佢有成三、四首歌。（主題曲邊個唱？）我試過爭，但爭唔到，監製話阿姐角色係唱歌嘛！由佢唱番適合啲！」
攝影：劉智源
化妝：Yen Lai
髮型；Vince Pang @ IL Colpo Platinum
文：影視組