謝賢恨做太空人唔怕曾江躁底
為慶祝今年台慶，無綫將不惜工本遠赴俄羅斯拍《四個小生去旅行》，除謝賢（四哥）、胡楓（修哥）及Joe Junior，更會加入曾江，令小生陣容更強勁。四哥特別要求一試做太空人滋味，亦不擔心同出名火爆的曾江開火。
謝賢、胡楓與Joe Junior在2013年為無綫拍攝台慶真人騷節目《三個小生去旅行》大受觀眾歡迎，當年已傳添食，醞釀兩年後終於成事，新一輯《四個小生去旅行》除有原本班底，更會加入出爐金像獎最佳男配角曾江。上次《三》到西班牙、葡萄牙及土耳其取景，《四》經四位小生商議後決定到俄羅斯拍攝，下月尾將出發。
靚女幕後降火
78歲的四哥仍有心有力，表明今次旅程要夠刺激，更要一試做太空人滋味，要求到太空中心接受太空人離心訓練，無綫即急急為他們加大保險。四哥受訪時笑說：「小兒科啫，之前都喺沙漠玩過越野車。（霆鋒、婷婷會唔會唔畀玩？）玩完先講啦。（會唔會先檢查心臟？）我都冇心臟嘅。」
四哥與曾江出名火氣勁，故無綫挑選了多位靚女幕後同行，萬一出現火爆場面也有靚女降火。問四哥可擔心與曾江開火？他笑說：「粵語片年代合作過一、兩次，佢躁唔躁底我唔知，但相信佢一定好用功，因為佢啱啱攞完金像獎。我都好忍得，係刀槍不入嘅老人家，最多喺鏡頭後爆粗。」
修哥則謂：「我同老四講明，我唔受得太刺激，呢啲交晒畀佢，佢點止飛天，遁地都得。（到時做四哥同曾江和事老？）大家咁多年朋友，年紀又差唔多，冇事嘅。不過，佢兩個一定好嘈。」
曾江搞笑失憶
昨晚與修哥一起出席活動的曾江，被問到可有睇自己有份演的《大時代》重播，他扮失憶笑言：「唔知咩係《大時代》，我有份演咩？」對於有指《大》拍電影版，曾江表示：「睇吓點，考慮吓，唔會選擇角色，依家盡量做好，但我唔鍾意走回頭路。」
文：影視組