藝人謝天華與太太Tina今年2月初喜獲麟兒謝浩飛（天天），有仔萬事足的二人經常分享湊仔的趣事，前晚Tina在微博上載謝天華谷起麒麟臂抱住天天的照片，並透露囝囝出世80日已重了9磅，又表示將由老竇謝天華接手湊仔的重任：「我家天天80日長了9磅肉，陪月亦已功成身退。好彩接手順利，安樂，謝謝！」
謝天華亦笑言囝囝現時10幾磅，日日抱住天天可以練麒麟臂：「依家可以一邊湊B、一邊健身，真係一舉兩得！」對於好友洪天明昨日再度添丁，謝天華表示替他高興：「我睇咗BB張相，佢有7磅幾睇落都幾結實。而我就祝BB可以身體健康、快高長大﹗」
