樂基兒只愛設計 唔做生意人

今年三月，樂基兒（Gaile）突然由峇里搬回香港，去年十一月宣布與老外男友Denim分手後，兩年情結束，她在峇里的生活似乎也告一段落，回流返港之後，她頻頻出席活動又行時裝騷，恍如走進時光隧道，回到數年前的Gaile模樣。她說：「以前飛得太多喇，最瘋狂時，一個星期去咗四個國家，多到本護照已經印滿晒，有時飛到已經唔執篋，以前年輕OK，依家唔可以成日飛。」

她走訪不同國家如泰國、印尼，為的是尋找特別的「石頭」做珠寶設計，去年她推出自家珠寶品牌Smoky Roses by gia，首個系列因反應不俗，遂激起了她的雄心壯志，現在又着手設計第二個系列，一年只推出一個系列，原來已教她忙到一頭煙，為了湊這頭生意她才回流返港，儘管她的家其實不在港：「我冇屋企人喺香港，以後或者將來我會留喺美國，始終鍾意美國嘅天氣多啲，屋企人都全部喺嗰邊，做嘢就會喺亞洲。」故是次「回流」，也並非是定居。

樂基兒愛上珠寶設計，首個系列反應良好。	Gaile返港後頻頻出席活動，並且多以性感造型示人。	樂基兒一邊做設計，一邊重拾模特兒工作，忙得起勁。

視覆電郵為苦差

Gaile說以前只有她和拍檔兩個人經營，二人分飾多角，做設計、品質控制和文件往來，現在發覺不能夠應付太多的工作，尤其是只愛做設計，視回覆電郵為苦差的她，回港後，她立刻請人專責做那些「苦差」，自己便可專心做設計。「我唔想有舖頭，只係想做wholesale，放首飾喺百貨公司賣，由佢哋管，我鍾意設計，但唔想做business woman，叫我營運一間公司，覆email回信我冇興趣，做creative永遠係creative，做business永遠係business，係兩種人。」

Gaile愛滑浪，不時上載照片到社交網站。

Gaile返港頭炮就是跟Anthony一齊行騷。

她續說：「依家慢慢明白更多，原來有啲石係唔可以咁切，有啲長鏈要每兩個厘米就要加個扣，因為人人腰長不同。我試過用唔同廠出品嘅玫瑰金，發覺各有不同，我將唔同廠嘅玫瑰金分別放喺盒裏面做實驗，放咗半年時間，去到邊都帶住佢哋，就發現玫瑰金都有所不同，有啲廠出嘅會易變色。」全副心神為興趣，完全與賺錢兩字脫鈎，笑言「打個和」已很開心了。

居無定所難拍拖

回復單身的Gaile，坦言暫時不想拍拖，並理性地認為跟她拍拖很慘，她說：「今次或者只係喺香港留半年，我唔知下年會住喺邊？可能有時喺紐約，有時喺峇里，同我拍拖嘅人，要明白唔可以成日同我喺同一個地方，咁對佢好唔公平。」離開香港也有一段時間，故她說仍未習慣香港的急促生活節奏，她覺得香港人行路很快，為重拾名模工作，她亦開始努力融入香港的生活，加快了步速。

再行騷好開心

Gaile回港首個工作，便是為品牌行時裝騷，雖貴為名模，就算是一個小型時裝騷，已令她感到緊張，她說：「我有五年冇行騷，雖然騷唔大，衫唔算多，但出台前都好緊張，要記住行左邊定右邊，好彩今次同Anthony一齊行，以前同佢行好多騷，有佢喺度，定好多，行時裝騷真係好開心，自己原來好掛住時裝，感覺唔同咗，好有新鮮感。」

採訪：Tracy Leung

攝影：張福宏

服裝：Timberland