黃芷晴遺傳劇毒

自細開始表演

父母都係演員，我或多或少都遺傳咗佢哋嘅演藝細胞，我讀幼稚園時已跟媽咪返教會，媽咪喺教會做導師，會安排同教小朋友表演，我當然係其中一個要表演嘅小朋友啦。升咗中學，我有玩舞台劇，玩咗七年，我好熱愛演戲，又想成為出色嘅舞台劇演員，可惜舞台劇喺香港未盛行，我好想幫手推廣舞台劇文化。

趁年輕作嘗試

其實中學時都打算將來會入娛樂圈，爹哋媽咪都冇話反唔反對，覺得係我決定，但媽咪就講明一定要完成大學課程先，爹哋覺得我應該趁後生去試，唔啱就快啲轉行，唔好嘥時間，浪費青春。

乖乖女黃芷晴是父母的掌上明珠。	黃芷晴指媽媽是她的私人形象指導。	身為黃日華與梁潔華的女兒，黃芷晴表示感到一定壓力。

星二代有壓力

爹哋媽咪都出名，問我有冇壓力？話冇你都唔信，我由細到大都被點咗相，成日都畀傳媒影到我，可能嗰時爹哋媽咪成日管接送，所以我自細對自己言行都好小心，唔想影響到佢哋。到我升大學，可能佢哋覺得我大個女，都唔使點理，就冇乜管接送。讀大學嗰時，冇人知我係黃日華同梁潔華個女，後期有啲同學知我身份覺得好驚訝，我就覺得好好笑。

2009年棒棒堂在港開騷，黃芷晴曾獲邀上台。	來自演藝世家的黃芷晴，自小已習慣面對鏡頭。	黃芷晴（前排右一）最近為珠江電視台拍劇。

逐步追尋夢想

我唔介意同爹哋合作拍戲，外界不時將我哋比較，我始終係新人，要時間磨練演技。我同爹哋根本冇得比，佢嘅演技收放自如，我仲要努力學習。媽咪跳芭蕾舞好叻，我繼承唔到佢嘅芭蕾舞舞技，但遺傳到佢嘅舞藝細胞，我跳Jazz同Hip Hop都叻。

我暫時都會想喺拍劇同電影方面發展，唱歌就唔好啦。自問唱歌唔好聽，但未至於五音不全，要出碟就要跟老師學唱歌先，總之逐步嚟，唔可以太心急，對名與利都唔會太強求，做演員係要發揮演技，我想拍齣好戲，演技上得到大家認同。

媽咪形象指導

我會珍惜每個演出機會，唔會計較係咪做主角，但工作以外，親情同樣重要，我家教好嚴，以前12點前要返到屋企，我知爹哋媽咪為我好，我冇反叛過，反而同佢哋感情仲好好，乜都有商有量。我同媽咪不時一齊行街買嘢，佢好有時尚觸覺，仲話我知今季興乜，我着乜衫好睇。媽咪係我私人形象指導，有時佢行街睇到有乜啱我就買畀我，佢仲話我知，台上台下嘅形象唔同，台下做自己可以日日素色衫，但台上就要有新鮮感，次次都要着唔同衫，要試唔同造型。

腸胃差勤驗身

依家媽咪病愈後發福咗，以前我會偷偷着佢啲衫，因為大家身形差唔多，但依家着唔到。其實媽咪呢個病，令我哋更注重健康，我哋一家腸胃差啲，可能食無定時，成日都消化不良，不過癌病就冇家族紀錄，始終年年驗身令自己安心。

攝影：劉智源

化妝、髮型：Cobia Cho

服裝：Sandro、Maje、H12H

場地：Beef & Liberty（金鐘）