Eason餓狼上身 喪吔熱狗
早前自爆體重高達188磅的陳奕迅（Eason），終於「的起心肝」減肥，開始積極做運動減肥，不過，美食當前仍忍不住口，難怪減極都圓碌碌。
「戰」後露疲態
當晚Eason唔同老婆徐濠縈跑步，反而相約Eric Kwok等全男班於大坑的中華游樂會打波做運動，一身運動裝束的他，落力大戰多個回合，出完一身汗後，於晚上九時多一臉疲態地步出。
運動過後的Eason，似是餓得要緊，只見他急步往街頭會合「梁炳」梁漢文，然後便帶隊往附近的西餐廳醫肚。
身形圓碌碌
美食當前Eason似乎將減肥大計拋諸腦後，極餓的他胃口大開，懶理儀態，擘大個口開心地大啖大啖食熱狗，同時亦未有拒絕高卡路里及高糖的薯條及汽水，大啖狂食，又汽水不離口，食飽至上，難怪Eason減極不瘦，身形依舊圓碌碌！
擦餐勁之後，梁炳先行離開，Eason素有「吹神」之稱，當然意猶未盡，積極邀其他朋友趕下場繼續吹水飲嘢，又再邊飲邊食過一晚，睇怕不戒掉暴飲暴食的習慣，Eason想修身成功恐怕不易。
文、攝：追蹤組