秋官難忘飲奶操肌

「丁蟹」鄭少秋（秋官）前晚到電視城錄影《Sunday靚聲王》，他透露當年為演丁蟹狂谷肌肉：「當年我要食大隻奶粉又做健身，谷肌肉。（你會拍《大時代》電影版？）睇吓點啦，我依家仲做丁蟹呀？會辛苦啲囉。（你怕做唔番？）梗係做到！水準得呀，好過以前添，但練大隻唔得嘛！（藍潔瑛唔拍電影版？）點解呢？唔通佢仲怕丁蟹？佢真係個好嘅女演員，咁入戲，無奈身體抱恙，可惜！（冇佢會失色？）我諗依家好多演員都拍唔到囉，當係留畀大家一個美好回憶啦！」秋官又徇眾要求畀股市貼士，他說：「上個禮拜個市有啲調整，但內地政策始終利好，我自己啲股票都未放呀！」