踢走躁鬱 盧凱彤畫出彩虹

很抗拒精神科

「2013年11月做完伊館騷，同朋友去冰島旅行，因為當地好靜，冇嘢做時出現好多唔開心情緒。雖然有朋友，但覺得好寂寞，開始覺得唔係好對路，返到香港喺朋友介紹下尋求心理醫生。初時醫生以為抑鬱症，因為純粹情緒低落同埋唔開心、個人冇乜動力，當時唔使食藥，只係心理輔導，每個星期去傾吓偈、訴吓心聲，但後尾發現愈嚟愈嚴重，開始做唔到嘢、成日喊同失眠，每日瞓六個鐘變三個鐘，兩個鐘到個半鐘，持續三、四個禮拜都係咁，真係唔妥同開始暴食，再強迫做運動。初時冇人知好收埋自己，雖然有朋友約，但不停用配樂做藉口唔見人，休息期間只係瞓覺、暴食同畫畫。

「因為明哥（黃耀明）作息時間顛倒，我同佢講失眠問題，佢叫我不如尋求專業協助，心理醫生只係傾偈幫唔到我，叫我去搵精神科醫生，一聽到精神科我就好抗拒，即係話我有問題啫？喺明哥勸喻下去咗睇，精神科唔係第一時間話我有病，只係話我抑鬱症畀啲藥我食，經過一、兩個月後先話係躁鬱症。抑鬱症情緒好低落，躁鬱唔係down就係high，情勢波動好大，食嘅藥比抑鬱多好多。都有試過唔想食藥，好抗拒，但係當時開始做出一啲瘋狂行為，明明唔鍾意飲酒，會一個人喺屋企飲到好醉。試過凌晨三點鐘求其落街上架巴士去咗長沙灣，之後迷路靠網上地圖返番屋企。」

情緒最差時，盧凱彤除了有幻聽外，更試過自殘	當時仍有人群恐懼症的盧凱彤出席頒獎禮時強顏歡笑。	全靠黃耀明鼓勵，盧凱彤才有決心看精神科醫生。

花九個月調藥

「有呢個病嘅人每一日諗法係有危險同埋控制唔到自己，我覺得最辛苦唔係病，而係開始食藥，因為啲藥係要調校，我用咗九個月時間先調到依家可以咁清晰傾偈。依家每日要食五種藥，當時有傷害自己，喺我好躁嘅時候試過用腳踢牆、摑過自己。雖然唔係重傷，但最大係心理上傷害同面對最黑暗嘅自己。喺2013年年尾發現有個心結同鬱結要去打開，可能一路以嚟對自己要求太高、苛刻，加上執着、衝動同超級好勝。

戰勝病魔後，盧凱彤早前自信十足露背出席金像獎典禮。	放大圖片	盧凱彤很慶幸身邊有很多好朋友支持。

「一向都有紋身，因為紋身師傅係好朋友，喺我差唔多穩定時同紋身師傅傾偈，我講咗好多故事佢聽，同佢講想變得更加勇敢，同埋好想為今次掙扎做個紀念，依家可以完完整整克服到呢個病，比起世界上任何嘢都更難，所以我想紋一個類似我嘅畫風紋身。以前咩都要收埋，依家可以豁出去，係畫畫醫好自己，原來可以使用唔同工具、方式去抒發自己。當音樂表達唔到自己嘅時候，其實仲有其他嘢揀。當時有諗係咪唔應該做呢行呢？或者搬去台灣算啦，直情諗過不如離開香港。

「我嘅思緒、混亂係嚟自幻覺同幻聽，會聽到有聲音同我講嘢，同我講『你要行去邊、你唔好食嘢、你做啲乜嘢』，會見到一啲唔存在嘅人，所以唔敢出街，每一日朝早六點半起身，七點半自己入赤柱聽海浪聲，因為唔想聽到其他聲音。想話畀大家聽，其實我去分享呢個躁鬱症係一個正能量，大家應該要去咁樣睇呢件事，每個人都有負面思想，係醫得好。食藥唔代表未康復，因為呢啲藥唔同傷風感冒，唔係停咗藥叫康復，醫生話要食番兩、三年。」

攞完獎不停喊

「自己係好後期先同父母講，承認依家食緊精神科藥物，佢哋好驚訝，從來我喺佢哋面前扮到嘢，亦叫佢哋唔使擔心。我都覺得要同家人交代，因為佢哋會見我手震、口齒不清同眼神恍惚，呢啲係病患者有嘅徵狀，我話依家有好好嘅醫生照顧我，所以鼓勵大家發現自己唔開心或有徵狀時要去睇醫生。

「我有病時，何韻詩成日捉我去佢屋企食早餐，我冇同佢講得好白，但佢feel到，Keep住update。年初叱咤頒獎禮當晚佢好照顧我，因為我有人群恐懼症，一見人就驚，上台攞獎講謝詞係最短，係講唔到落去已經喊，落台訪問都冇做就走咗，喺停車場不停喊，手又不停震。

「五月六日開始會舉行慈善畫展，入面會展出我過去一年所畫嘅畫，都有成一百幅，所有收益扣除成本會捐畀思覺基金，屆時會有新書賣，書入面會有相同文字，大部分都係講番患病時所經歷嘅嘢，希望大家睇完唔好驚自己有問題，因為情緒病已經係都市病，只要及早求醫一定會好。」

後記：切勿諱疾忌醫

筆者可以講係睇住Ellen成長，喺筆者心中佢較為內向，雖然唔會主動撩傾偈，但每次活動見面，佢都好有禮貌打招呼同笑笑口。畀人陽光感覺兼爽朗嘅佢，勢估唔到會患上躁鬱症，真係每人有自己嘅故事。訪問當日，Ellen打開心扉坦蕩蕩講述發病及治療過程，聽到筆者都手震同手心冒汗，佢嘅出發點完全係鼓勵有病嘅人千祈唔好諱疾忌醫。筆者衷心祝Ellen身體健康同開開心心。

文：羅宛君

攝：劉智源

化妝：Hubei Har

髮型：John Hui@Hair Culture

場地：Boom