蝦頭正印風嫂龍小菌：唔尷尬

近年殺入公仔箱演出無綫節目《Sunday扮嘢王》，扮嘢扮到出神入化的蝦頭昨日被《好報》大爆與肥仔經理人邵子風撻着，兩人在西貢共築愛巢，近日更毫無顧忌到將軍澳的街市拖手買餸，邵子風盡顯好男友本色，食材採購全由蝦頭「揸Fit」，又單手抽起大袋餸，另一隻手則繼續牽緊愛人。

特級醋埕(目及)實男友

《好報》又爆料指，蝦頭其實是「特級醋埕」，嚴格「過濾」邵子風的異性朋友，連邵子風的好友歌手迪子亦不放過，直至肯定對方不是邵子風杯茶才安心。早前一直有傳邵子風與龍小菌因工作關係日久生情，繼而變成情侶，兩人亦曾拍得拖手出街，但因邵子風情緒波動大，才忍痛砍纜，令蝦頭「乘虛而入」。小菌被同門的蝦頭撬牆腳後，就心碎敗走台灣，不時在網上大呻「失戀之痛」。

龍小菌死口否認與邵子風拍過拖。（資料圖片）	（左起）龍小菌、蝦頭和邵子風昨來個世紀合照，證彼此沒芥蒂。	今期《好報》驚爆蝦頭與邵子風拍拖。

不過，在這段錯綜複雜的「三角戀」中，原來蝦頭與邵子風已秘交一年多，早在2014年兩人已光明正大情侶檔搵銀，為《求婚大作戰》擔任「求婚拯救隊」，兩人在節目中不時穿情侶裝和婚紗亮相，相當甜蜜。今年愚人節，邵子風更似是而非上載「頭貼頭」蜜照，乘機宣布「我們一起了！」當時不少網民都拍手叫好。

買凍肉時，邵子風情不自禁搭實蝦頭肩膊。

蝦頭與邵子風被影到出雙入對，非常sweet。

記者致電邵子風，他大方承認與蝦頭拍拖：「一早公開咗啦，我愚人節嗰日將合照同寫咗『我哋交往中』放喺Facebook，冇人信之嘛。」問是否鍾情「珠圓玉潤」女仔？邵子風即賣口乖力撐女友已瘦了很多。兩人是否已發展到同居關係？他直言：「一時時啦，睇日子，睇吓方唔方便。（睇男定女唔方便啊？）睇吓返工地點同時間，同交通方唔方便。」問邵子風幾時跟將踏入40歲的蝦頭結婚？他就話未想到太長遠：「我都唔知擺得幾耐。」

自嘲「一夫侍兩女」

講到與小菌的緋聞，邵子風即劃清界線：「唔係，我一早講咗我同小菌冇拍拖。（曾影到你哋拖手？）我可以同你（記者）拖手，我哋係好朋友。」有指小菌難忍他情緒起伏大而提出分手，邵子風直言：「我2011年，因爸爸過身患上躁鬱症，係嚴重隻，近一、兩年就係嚴重抑鬱症，但好番好多啦。」

邵子風又澄清小菌並非失戀「放逐」台灣，只是逗留幾天出席音樂節活動：「呢排少見佢係因為佢讀緊港大中文系master。」他更笑言現在要「一夫侍兩女」，亦不會與小菌感到尷尬。而小菌就聲稱：「我冇同子風拍拖，所以唔尷尬。」故她不認為自己被蝦頭撬牆腳。

另《好報》見街後，邵子風將報道放上Facebook，笑言感謝《好報》讓他上頭版，又搞笑留言問小菌：「係咪好傷心？」又自嘲可以同男神黃子華爭女，感覺好威威！而蝦頭至截稿前未有回應。

文：音樂組