陳美齡「登6」再戰歌壇

陳美齡為慶祝今年8月20日的60歲生辰，6月將率先推出新歌預祝，她說：「我搵咗當年喺日本初出道合作過嘅監製，為我打造新歌叫《求婚》。老公（金子力）話做乜等佢退咗休至整首咁好嘅歌？（借歌幫仔仔求婚？）唔係，咁啱啫！回想番初入行，冇諗過唱到咁耐仲有人肯聽，好感恩！我爸爸過身時58歲，我嘅歲數已大過爸爸啦！其實我工作咗40幾年，依家有家庭、有工作，唯一係無女兒囉！不過，我覺得60歲啱啱係一個循環（甲子）嘅新開始，係新里程碑！」

地震後做義工助人

Agnes笑言60歲是維繫夫妻感情的關鍵：「依家三個仔都大晒，會慢慢離開屋企，組織家庭，依家係維繫夫妻感情最大關鍵。金子力已退咗休，公司由佢做相談役（顧問），我做社長，但我好烏龍，試過鎖咗公司印喺夾萬，開唔到，找唔到數。（唔退休同老公享受人生？）我想工作、想幫多啲人。當年日本311大地震，有好多人一夜間乜都冇晒。地震後我心情好差冇法工作，後來聽日本天皇講，地震創傷未完，我覺得我應該正面啲，運用影響力做義工，推動社會去幫人。」

美齡笑言60歲是與已退休的丈夫金子力維繫夫妻感情的關鍵。	美齡成功對抗乳癌，即寄語大家定期做身體檢查的重要性。	美齡三子已長大成人，將組織自己家庭。

抗癌成功注重健康

Agnes初次處理公司印雖鬧出「糊塗甲子」笑料，但面對身體健康則始終精明，她說：「八年前我患咗乳癌，當時我原本要做個唱，後來因會場裝修延期。有日瞓喺屋企梳化休息，突然摸到胸部有粒好似米狀嘅物體。如果唔係前幾日聽完個癌症講座，我可能唔當一回事，亦未必有意識去搵醫生做檢查，更加唔會喺癌症早期就去醫，仲康復埋！所以大家都要定期做檢查。」

文：陳奕龍

攝：黎志輝