洪永城含春嗒唐：發展得幾好！
藝人洪永城自從講到出口對唐詩詠有意思後，近日看來已漸見成果，昨日他出席新劇拜神時，雖然仍未肯親口宣布拖友關係，但講起唐詩詠時，他即一副冧樣，問二人關係如何時，他直認：「發展得幾好！」
洪永城（Tony）及李佳芯、陳慧珊（Flora）等無綫新劇《波士早晨》演員，昨日到電視城出席開鏡拜神儀式。Tony受訪時春風滿面，問是否正式宣布和唐詩詠的拖友關係？他說：「唔知呀，但係發展得幾好！（你哋已經同居？）哈哈哈，梗係唔係啦，點解咁傳？我哋一齊行街，有共『同』話題啫！（女方唔想公開關係？）我唔知點解釋，不過有消息會同大家講，我發覺好多人都好鍾意我哋做一對。（乘勢公布拖友關係？）好呀，不過我都唔知咩時候！」
李佳芯又做小三
李佳芯於劇中與洪永城有感情線，她說：「劇中洪永城有老婆，但我哋都有感情線。（做第三者？）我好似被定咗型咁，其實我都唔知今次算唔算壞女人，但個角色會比《名門暗戰》好啲，我惟有咁樣諗啦！」未知Tony是否怕與李佳芯傳緋聞，他被同劇演員邀玩自拍時，也是與陳慧珊或黃智賢等一大班人齊齊影相，似乎想讓唐詩詠放心。
陳慧珊拒絕受訪
以黑超西裝look示人的Flora早前被指拍劇鬧情緒，但昨日與演員玩自拍又遞生果給記者，表現友善。不過當記者想訪問她時，她即時拒絕：「關於個劇，要講嘅已經講晒，有問題可以問番監製。至於私人嘢，我不嬲唔講。」問是否想澄清負面報道時，她即耍手示意不用並離記者而去。監製關永忠為Flora講好話：「Flora拍攝時冇嘢喎，拍得好順利。（佢唔接受訪問。）或者佢唔想再講，可能係怕解釋會被人當咗係掩飾。」
文：影視組