徐天佑自得其樂
「摘去鮮花 然後種出大廈」這句歌詞相信很多8、90後並不陌生，於Concert YY黃偉文作品展中獻唱一首《燕尾蝶》，勾起無數人集體回憶，令組合Shine重新彈起，更讓早已放棄音樂的徐天佑重拾熱情，今年決意飛甩又南，推出屬於自己的個人專輯，以徐天佑身份與大眾分享自己的感受。
凡事無絕對
天佑一直以Shine名義與拍檔又南拍住上，推出多首具正能量的歌曲，有感自己的性格與Shine給人的形象有別，決定以自己的音樂，讓大眾認識徐天佑本人。
「其實呢幾年Shine先唱番歌，2012同2013年都放咗好多時間喺音樂上，上年都為電影寫咗首歌，然後我哋覺得Shine嘅合作模式係有靈感或者有題材先做，但我自己都有啲感覺想講嗰陣，就覺得係時候做個人唱片，都計劃咗一段時間。我細個好鍾意電子音樂，自己隻碟風格上會多咗電子，以前歌曲會青春啲，依家冇咁『Shine』，好似有首歌想講世界係咪烏雲密布？雖然個觀念係悲觀，但唔代表唔開心，係要靠自己發掘陽光，我個出發點係從悲觀出發，但凡事都冇絕對，反而係要兩睇，其實都同我性格有關，我唔係好正面，但唔算悲觀，而Shine同我最大嘅分別係我冇咁單純，Shine不論做嘢諗嘢都好直接，好似《第二春》首歌講16歲定60歲都要抱希望，但自己嘅話，除咗抱希望，可能會諗埋個過程，就算放棄唔代表失敗等等，Shine係簡單有希望，我係寫實啲。」
人變情不變
Shine由出道至今經歷起起跌跌，一度讓他們放棄唱歌，專注電影發展，直到在黃偉文（Wyman）的作品展中一鳴驚人，勾起大眾的集體回憶，成功反彈，Shine這個名字再次出現在樂迷口中。
「講放棄喺06年就一早放棄咗，嗰陣做得唔開心，覺得做嘅嘢唔係自己諗，所以06年做完碟後同經理人叫停，5年嚟收埋晒樂器，望都冇望過，放棄主要原因係心態問題，唔關市場反應，我哋仲有市場，一直都有人問幾時出新歌，但以前第一隻碟我聽嗰陣會回味，但慢慢發現啲歌唔係自己感覺，開始到瓶頸位所以停咗。以前拎結他係寫歌，好有壓力，過咗幾年後再拎起結他，冇咗嗰種感覺，單純想玩吓，心態輕鬆咗，咁啱嗰陣10周年有好多歌迷問有咩慶祝，而嗰陣Wyman個騷推動我哋做呢件事，係踏腳石。」
自資碟留念
今次天佑拋下拍檔出碟，想增加主導性的他，更決定自資出碟，希望擁有實物留個紀念，而凡事依靠自己的他，更不會因剩下自己而感到不習慣。
「我哋兩個做音樂係獨立，都有Solo嘅嘢，但自己做嘅過程係enjoy，因為音樂係自己諗出嚟，另外自資出碟壓力冇咁大，自由度都大啲，咁都會想搵唱片公司幫手發行，依家感覺做音樂唔係為趕有貨而推出，我曾經都有諗過有歌就推出嚟，但諗諗吓可能唔使，反而係首歌人哋鍾唔鍾意，同埋都會想出隻實體碟，不過諗住係限量版，因為有意思啲，留個紀念同埋等會買碟嘅人買，至於成績，其實都係平常心，反而會緊張首歌自己滿唔滿意，或者係咪自己想出嘅嘢。」
後記：無限復活
還記得小編問天佑甚麼時候Shine再合體出碟？當時天佑笑言：「其實我哋一直都冇拆夥，一直都仲有一齊唱歌，但啲人成日用復出形容我哋，好似06年《鼎鼎大名》嗰陣已經話我哋復出，喺黃偉文個騷表演後又畀人叫復出，都好得意。」雖然常遭受誤會，但證明Shine在樂迷心中仍有一定位置，所以不論他們以組合還是以個人身份，都快點多多露面，相信很多樂迷都期待你們「復出」多次。
口述：徐天佑
筆錄：勞撈
攝記：司徒國榮
場地：Hide n" Seek
髮型：Louis Tse＠P.O.P 8
化妝：Henry Tse
服飾：TOPMAN