鍾舒漫恨買樓 問老闆抓折頭
歌手鍾舒漫（Sherman）昨日穿上背心短褲大騷長腿出席英皇國際港島海景豪宅「維港峰」Upton新聞發布會，透露今年有意置業，並笑言想向老闆楊受成攞折頭買樓：「作為英皇員工，比較有着數就係可以問老闆攞折。（儲夠首期未？）努力籌備緊，依家有周圍望吓樓，又有儲吓錢。（買番英皇旗下樓盤？）絕對有保證！」
先買二手車
問到可會買維港峰？她即賣口乖幫樓盤賣廣告：「會周圍望吓先，但維港峰當然絕對有保證，同埋頭三個買家仲要送電動車。」她亦透露就算今年未能置業，都希望能跟妹妹完成買車心願：「諗住同妹妹平平哋買住架車先，因為考車牌成年幾都未開始揸有少少驚，開頭想買架二手車，驚新車整花會肉赤。」
撐鄭希怡OK
而談到好友鄭希怡（Yumiko）愛女「梁浸浸」出世不久便轉去新生嬰兒深切治療部（NICU），至今已留院十日，Sherman透露雖然BB仍未出得院，但已無大礙。問到Yumiko現時心情？她坦言：「ok呀！（佢係咪仲好擔心？）冇問得咁detail，但聽佢口脗好正面、開心。我都有同佢講，等佢屋企容許到客人去探佢時，我同妹妹就會去搵佢，我哋都想為BB準備禮物，佢話ok就會通知我。」她又謂未真正看過其BB，但相信BB一定是手長腳長。另談到與舊愛吳浩康的關係，Sherman則語帶保留謂：「正常。（會唔會復合？）將來嘅嘢冇人知。」
而Yumiko昨午上載一張拖住愛女小手的相片，並留言謂：「如果留喺醫院，會令你健康啲嘅話，好，唔急住返屋企，唔急。」暗示其愛女仍要繼續留院觀察。
文：音樂組