子珊中頭獎 鼻腫喊爆

藝人徐子珊、馬德鐘、黃光亮、朱千雪、江美儀和李思捷等，昨日到荃灣一間中學與學生打籃球宣傳無綫劇《以和為貴》。大合照時卻發生「意外」，蹲在前排的黃光亮突然將籃球向後拋，籃球打中馬德鐘手上的咪高峰，咪高峰再彈向旁邊的徐子珊，子珊的鼻和頭即時中招，痛得她雙眼通紅流淚，馬德鐘見狀即安撫她，李思捷打圓場說：「好開心、好開心」，子珊最後要到後台休息。

「要佢養我下半世」

約10分鐘後，鼻樑紅腫的子珊再出場，並走向黃光亮「大興問罪之師」，黃光亮扮作半跪求饒，子珊則假意向他揮拳還擊，子珊說：「冇喊，標眼水啫！佢成日都係咁，但佢唔小心啫。（擔心留疤？）腫咗啫，應該搵冰敷吓冇事，有咩事要佢養我下半世。（咁重口味？）三餐包住宿咋，冇其他嘢。」

籃球彈中馬德鐘支咪，成支咪即時撞向徐子珊。	痛到嗌的徐子珊鼻腫腫，令馬德鐘大為緊張。	鼻腫

「罪魁禍首」黃光亮卻似毫無悔意，他笑說：「冇咩好內疚，我拋個波冇打中佢，係馬德鐘用支咪撥開個波先打中佢，我係代罪羔羊。經過調解員分析後係冇人有錯，萬事以和為貴。（佢當黑？）唔好咁講，破財擋災囉。（佢要你養佢一世！）睇吓佢一餐食幾多錢啦，平平哋都得嘅。（可能毁容！）毁唔毁佢都係咁上下。（都係咁靚？）係咁上下，唔好講靚唔靚。」事後馬德鐘再出席活動時笑言：「唔介意食死貓。」

李思捷狂讚心穎

另外，李思捷最近與黃心穎傳緋聞，思捷說：「唔係拍拖，邊個上我家關佢（雜誌）鬼事咩。（暗撻三個月？）朋友唔止三個月。（發展機會？）一定有，冇嘢冇可能。（女方有咩優點？）靚女，青春，有才華，做朋友一流。（做情侶呢？）都可以考慮。」而子珊被問起思捷與心穎的緋聞時說：「又借碟呀？人哋嘅事唔方便評論。」

文：影視組