吳業坤多年心願 恨出唱片
於2010年參加無綫的歌唱比賽《超級巨聲2》獲第五名而加入電視圈的吳業坤，去年在無綫台慶扮「棋子」爆紅，雖然最近拍劇兼做主持，又憑惡搞《衝上雲霄》MV再度上位！但明天便25歲生日的他，並沒有忘記自己的最愛，他表示最大的願望依舊是出唱片！
入行5年的吳業坤（坤哥），繼去年在台慶扮「棋子」成為熱話後，最近憑惡搞《衝上雲霄》MV又再爆紅網絡！他坦言自己沒有偶像包袱：「只要唔係貶低我嘅角色，我都可以接受！（可以再扮多次棋子？）如果件事係好嘅，係有意義我可以！但為扮而扮就無謂啦！」
唔介意有負評
至於多次受關注都是由網民帶起，坤哥亦直認自己是網民：「其實我都係好多討論區嘅會員，有時仲會特登search自己個名，睇下人哋點講。（睇到負評會唔會傷心？）咁又唔會，始終網上講嘢可以好唔負責任！」對於自己的鄰家男孩形象，坤哥說：「我鍾意呢種感覺，冇咩距離感！好似之前拍戲，有啲工作人員會斟水甚至幫我換埋衫，但我覺得唔使咁服侍，大家係平等嘅！」
拍劇可塑性高
明天是坤哥25歲生日，他坦言不會放棄唱歌夢想，生日最大願望是出唱片，他笑說：「呢個願其實都許咗好多年！我有預感呢年都出唔到，就唔得o架啦！」談到吳若希為電視劇唱《越難越愛》而爆紅，坤哥說：「其實我之前都有唱過電視劇插曲，因為公司都有好多歌手，有任何機會，我都會把握！（多啲拍劇？）我覺得自己可塑性幾高，之前拍古裝，除低眼鏡同化晒妝之後，經理人都唔認得我！」
文：專案組