麥兆輝睇好劉青雲 土豪稱霸

劉青雲、吳彥祖、彭于晏及黃渤四大猛男將於今屆金像獎一爭影帝之位，絕對是來自五湖四海猛人雲集！打滾演藝圈逾三十年的劉青雲演技不容置疑，但多年來只曾於2007年憑《我要成名》獲影帝，今年他憑兩片入圍，令奪獎機會大增！至於內地演員黃渤曾封台灣金馬獎影帝，吳彥祖亦曾奪金馬獎男配角，影壇新貴、33歲的台灣男星彭于晏首度提名影帝，實力皆不能忽視。

激讚超額完成

本報請來資深導演麥兆輝點評幾位影帝提名人，他認為是青雲及黃渤之爭，但較睇好青雲在電影《竊聽風雲3》中扮演粗魯土豪的精湛演出，他笑言雖是《竊3》導演，但絕冇偏心：「青雲喺三集電影嘅演出都有變化，由第一次做差人到今次演土豪，層次愈來愈難，上兩集佢都提名影帝，但冇攞到，今次有就更圓滿！」

麥兆輝	彭于晏	吳彥祖

他透露青雲拍攝《竊3》時曾對角色存疑，但仍超額完成：「佢話角色係老粗，姦咗周迅都得，點解要精神戀愛？但我哋覺得營造上係有需要，青雲有呢個心結，起初唔認同，但都盡量演，仲做得非常好！」其實除導演之外，不少同行都睇好青雲，對此青雲回應：「多謝支持。（有冇信心？）咁多年都係咁，得獎與否，順其自然，都係平常心。」

黃渤角色難演

提到黃渤，麥兆輝認為他演技甚佳，但要稱帝尚有阻力：「內地演員對某啲角色有既定模式去演，因為太熟手，似交功課，但今次黃渤好自然，好人性，難演但演得好！金像獎有兩輪評選，有好多業內人士投票，係公平嘅，但評委有一種同心力，傾向本地男演員，呢樣佢先天蝕底咗。」

另麥兆輝亦指另一入圍影帝的吳彥祖，並非最好演繹：「佢係少數華人演員有得選擇，佢母語係英文同普通話，可以去荷里活，但如果留港，一定要苦練廣東話，最近覺得佢廣東話退步咗，呢樣對演戲打咗折扣。」而他亦大讚彭于晏外形討好有潛質，但要再努力幾年。

此外，麥兆輝與莊文強再憑電影《竊聽風雲3》獲提名最佳電影、導演及編劇，他表示三集都曾獲幾個主要提名，感覺榮幸！

最佳男主角提名名單

彭于晏《黃飛鴻之英雄有夢》

劉青雲《暴瘋語》

黃渤《親愛的》

吳彥祖《魔警》

劉青雲《竊聽風雲３》

文：影視組

攝：吳文聰