基仔忍辱負重 爆粗捉賊
古巨基的演藝經歷深深吸引電影《衝鋒車》導演劉浩良，成為心目中的唯一的「真警察」人選。惟這「真警察」需面對的考驗絕不簡單，除踏單車、炒車外，基仔更要挑戰自我克服畏高兼且破壞形象講粗口。
今次古巨基（基仔）在電影《衝鋒車》中飾演戲中唯一的「真警察」，但原來在導演劉浩良的心目中，基仔的演藝經歷恰巧配合角色設計，是自己心目中的唯一，劉導說：「佢之前做咁耐電視主持，隱藏咗自己識唱歌呢件事，係等一個機會，話畀大家聽原來我唱歌唱得好好，嗰種忍辱負重、等一刻去證實自己呢個情緒，我就係要呢種。」
畏高腳仔軟
其實今次基仔要演好這警察角色絕不容易，因為整個角色都被劉導瘋狂挑戰，而第一項正是踩單車追賊，基仔說：「本身只係細個踩單車郊遊嗰種，但你話要踩到追賊咁就唔係好得，為咗呢個角色我搵咗一個教練去學，去練習踩單車。」在旁的劉導續說：「其實今次戲入面佢最多辛苦嘢，我都覺我一路都搵啲嘢嚟搞，又要佢講粗口，佢仲要一開始就炒車，所以呢個靚仔一路都係包住個頭。」
提到困難重重，基仔再憶述其難忘棄車場的經歷，想起都腳軟，笑謂：「佢哋用吊臂吊高咗隻遊艇，我就企喺上面，有三、四層樓高，而我本身係有少少畏高，上到上面嗰時，的確係有腳仔軟。」
獲前輩照顧
雖然基仔面對着劉導的各項挑戰，但他表示能夠與任達華和吳鎮宇等強大陣容合作而感到興奮，更大讚任、吳二人細心體貼：「有一場係講我經歷槍戰之後要落小巴再跌落地，咁鎮宇哥同華哥就驚我跌親，周圍搵啲墊畀我，喺一啲好細節嘅地方感受到佢哋好照顧我。」
Make-up：Circle Cheung（ndnco.co）
Hair：Mark Ip @ hair
Venue：Alice Wild Luscious
文：影視組