許志安台上換衫 腹肌on call
許志安近日為紅館個唱積極練舞，更被舞步成功洗腦，即使睇電視也「舞」不停。弗到漏油的安仔預告六舊半腹肌已隨時「on call」，將會把舞台當成更衣室，在萬人見證下爆肌換衫！
許志安昨日為月底起舉行一連四場的《Come On許志安演唱會2015》綵排，與舞蹈員齊齊預演勁舞，安仔隨即「舞王」上身，Chok爆全場！他預告在個唱上將會上演十多分鐘的跳舞環節，近日排舞排到上腦的安仔表示：「幾擔心體力，有時臨瞓前都會諗起舞步，睇電視又會手郁郁，好似做緊Sit-Up咁。有時演唱會做啲自己緊張嘅嘢，出嚟嘅效果就會幾好。」
要着多幾條褲除
除了連環勁舞外，安仔暗示恨跳辣身舞，當問到屆時可會表演辣身舞？他說：「係囉，排到依家都冇，不過可能有Part會喺舞台換衫，放個衫架喺度。」問可會當眾換褲益歌迷？安仔邊笑邊擰頭說：「咁我要着多幾條喺入面先。」
六舊水睇六舊肌
最近練得一身肌肉的安仔稱目標練出「人魚線」，暫時已成功操到六舊半「朱古力」，隨時爆肌，安仔笑說：「有朋友話畀咗六舊幾水嚟買飛，我要畀番六舊腹肌佢哋睇。」他又透露正在內地趕工炮製「巨型安仔」的舞台擺設，大玩舞台效果：「都有成30、40呎高，得個上身，但因為太大啦，唔諗住帶佢走埠，我諗澳門個場都唔得。」
文：音樂組