薛凱琪拎女配預告會暈
擁有10年戲齡的薛凱琪（Fiona），最近以處女姿態入圍金像獎「最佳女配角」，不過面對鮑起靜及惠英紅兩位影后勁敵，Fiona直言沒想過爭獎，亦不會把獎項設定為人生追求目標，更指若然當晚拎獎定必暈倒後台！
不論音樂或是電影世界裏的薛凱琪均是乖乖女形象，不過早前伊人終跳出框框，於電影《閨密》演一名豪放女，對從影10年的她可算大挑戰，結果亦順利入圍今屆香港電影金像獎「最佳女配角」五強，面對鮑起靜、惠英紅、王菀之（Ivana）及郝蕾等對手，Fiona表示尚未看齊所有作品。
投票畀鮑姐
雖然被大讚演出不俗，但Fiona坦言未有投自己一票，反而投了戲味十足的好友鮑起靜，她說：「投票要等人去投，唔係自己投自己，冇理由話自己最好，新演員就投Ivana，（叫佢唔好爭女配角？）唔會，佢企出嚟已經好笑，好有搞笑天分，鮑姐就因為佢喺入圍作品入面好恐怖，好竭斯底里，同平時嘅慈祥樣分別好大，之前講笑話佢一係平時都演緊戲，一係啲戲好好，咁佢一定係後者。」
對於獲另一位勁敵惠英紅大讚她喊功一流，Fiona興奮指感激對方欣賞，更謂：「睇過佢啲戲，係個100%投入嘅演員，所以如果佢同鮑姐是但一個拎獎我都好開心，我就冇set定呢個係目標，亦冇諗過要爭，畀我嘅話相信我會喺後台暈低。」
愛情玩唔起
談到戲中對愛情大膽，Fiona透露現實生活剛好相反，她絕對沒有勇氣於心儀對象面前示愛，惟有把勇氣放在角色上，她說：「我唔會因為拍某啲戲改變本質，喺電影盡情愛，要不然就唔好接，好多人話做得好似，其實我每場都飲少少酒，拍完抽身出嚟好舒服，喺愛情路上我玩唔起，所以依家有提名已係好大獎項。（對自己有信心？）只可以講信心來自拍戲時畀足120%投入，結果就隨緣，作為藝人只憑一個獎就斷定嗰一年有冇努力過太殘忍，得到嘅話亦唔代表其他入圍者唔值得拎呢個獎，所以唔想太多。」於音樂頒獎禮上獲獎無數的她，影壇獎項卻尚未開齋，Fiona坦言當獎項來到她手上時會瘋狂開心，不過即使冇也不會有絲毫失望。
攝影：吳文聰
髮型：Car @ Pop 8
化妝：Jessica Chan
服裝：Marc Jacobs
文：影視組