鍾嘉欣撐伍允龍：關係OK
藝人鍾嘉欣與武打演員伍允龍的八年情近日掀暗湧，同時傳出陳展鵬介入。前晚嘉欣和展鵬齊齊公幹返港，面對感情困局，嘉欣仍為男友伍允龍護航：「我哋關係OK！」據知全因伍允龍成功箍煲，故嘉欣身體力行與展鵬保持距離。
鍾嘉欣、伍允龍拍拖八年早前傳出分手，嘉欣情傾陳展鵬，「嘉鵬」被爆料指「終走在一起」，加上二人往新西蘭登台時，被發現穿情侶裝甜蜜行超市，「嘉鵬戀」更加似層層！不過，近年「嘉龍戀」逐漸浮面，去年嘉欣生日高調網晒合照，但據知兩人感情正陷困局，所以嘉欣在剛過去的生日，朋友亦識趣沒有大搞派對外，伍允龍亦成功越洋箍煲，難怪嘉欣和展鵬保持距離。
演情侶都冇所謂
前晚9時半，「嘉鵬」及經理人從新西蘭飛抵香港，嘉欣刻意墮後與展鵬保持距離，被問到與伍允龍關係時，據知已被伍允龍「箍掂」的她保持微笑說：「私人事唔回應。（傳你同陳展鵬撻着？）唔係，冇可能！我同陳展鵬只係同經理人去超市買嘢。」不過問到有指伍允龍會為無綫拍劇時，她說：「冇聽過，如果係真會畀貼士佢。（怕唔怕撞到尷尬？）唔會，我哋關係OK。（合演情侶？）好！咁熟冇所謂，大家都係專業。」稍後她會返內地拍王晶新劇《哪吒》，跟王祖藍合作。
祖藍：拍得開心
至於陳展鵬則表現避忌，否認撻着傳聞，問到嘉欣是否分手、以及有否發展機會？他即說：「都唔關我事，之前都講過晒，唔想再講！」而未為情變傳聞解畫的伍允龍，在instagram上載踢腿、及做電燈膽與安志杰和Jessica C.一起打保齡的相片。另方面，嘉欣的好姊妹王君馨坦言久未見伍允龍：「嘉欣近排都好好，依家OK，我好放心！伍允龍我好耐冇見！」而王祖藍則說：「人哋感情問題我唔講嘞！最緊要佢拍得開心啦！」
文：專案組