文凱玲 唐紫睿 好姊妹唔爭仔
「新晶女郎」文凱玲（Connie）與唐紫睿（Hazel）一個柔弱溫文似小女人、一個性格剛烈似真「漢子」，同為影壇新丁的她們深明準備愈多、機會愈多，學唱歌、跳舞、功夫、騎馬等等，因為路線不同，她們不擔心會「爭job做」，反而會互相扶持、提點！目前仍是單身的兩人又表示不會爭仔，因為Hazel鍾意善良、靚仔型，Connie重體貼，不介意男仔外表。
文凱玲：文 唐紫睿：唐
晶女郎 愈傾愈熟
文：其實我哋簽晶哥（王晶）嘅時間好似差唔多，差幾個月咁。
唐：好似係，因為同公司，成日會見面，慢慢傾多咗偈就熟咗。
文：喺我印象中，你係比較剛烈、男仔頭性格嘅女仔。
唐：你就比較柔弱啲、女仔啲。
文：記唔記得我哋係點樣變熟？
唐：拍《唐伯虎衝上雲霄》嗰陣，嗰段時間真係好艱辛o架。
文：係，拍得好趕，個個休息都唔夠。
唐：而且橫店好凍，啲戲服又薄。
文：着古裝去廁所仲好麻煩，因為有好多層衫。
唐：其實嗰段時間我哋都叫相依為命。
文：係呀，大家都互相照顧，拍完啲鏡頭一齊睇番，研究吓有咩進步空間
唐：收咗工又會一齊去食吓消夜，傾吓大家今日嘅表現點。
戲路不同 免搶飯碗
文：有人話，同行如敵國，但我覺得唔係，我同你路線唔同，大家做唔同嘅角色。
唐：同公司又點啫，唔代表要鬥個你死我活，應該係良性競爭。
文：我比較適合做斯文啲、女人啲嘅角色。
唐：我就比較適合做個性剛烈、中性啲嘅角色。
文：所以我哋都爭唔到大家啲角色做。
齊齊學藝傍身
唐：由模特兒轉做演員，真係好唔同，所以我依家學好多嘢。
文：係囉，我都有學唱歌、跳舞、功夫、騎馬。
唐：我同你差唔多啦，一個星期七日，有六日都用嚟學嘢。
文：你仲帶我去學武術添！
唐：係囉，幾時過兩招呀？
文：哈哈，我哋都係BB班，有排啦！
講感情 各有喜愛
文：識你咁耐，原來我哋好少傾感情嘢。
唐：鬼咩，入行咁耐就單身咁耐，過咗去嘅嘢就唔好提啦。
文：咁你嘅理想對象係點o架？
唐：嗯……要善良、愛我，同埋靚仔！
文：哈哈，我同你相反，我唔介意外表，但我重視體貼，最重要係可以傾到偈。
唐：咁我哋一定唔會爭仔啦！
文：咁你有冇諗過幾時結婚生仔？
唐：冇喎，我工作年資得一年，梗係搏殺搵錢先啦！
文：我都係，不過我屋企人唔止催我結婚啦，仲催我生仔！因為我係大家姐！
有讚有彈蝦碌事
唐：我覺得作為同公司藝人，應該不時交流，大家傾吓，咁先有進步。
文：係呀，其實我覺得你擺pose好叻，影相出嚟嘅效果好好，而且講嘢好真，冇咩背後意思。
唐：咁缺點呢？
文：缺點就係個人太慢熱啦，唔熟你嘅人就會覺得你好寸，比較難相處，如果可以早啲畀人見到你真實嘅一面，其實會好好多，咁我呢？
唐：你口才、應對都好好，缺點係太容易緊張，改到嘅話，做嘢嗰啲蝦碌會少好多！
文：哎呀，真係醜事傳千里呀！拍《賭城風雲Ⅱ》嗰陣，我因為戴咗耳塞，以為係正式拍攝，我就真係開咗槍，結果大家冇戴耳塞，嚇咗一嚇，雖然係空包彈，都好大聲o架。
唐：我蝦碌嘢都唔少o架，拍《鴨王》時，劇情講到我畀何華超捉咗，綁住我要踢我落海，明明係試戲，但我就亂郁，結果真係跌咗落水，超哥想救都救唔切。
文：其實最擔心係自己唔小心出錯，搞到拍攝進度受阻。
唐：係囉，我跌落水之後，要重新換過啲衫、吹頭、化妝。
後記：42" VS 44"長腿
晶女郎的共同點，就是都擁有一雙長腿！入行前做過空姐、選港姐出身的文凱玲就擁有42吋長腿。模特兒出身的唐紫睿更誇張，一雙美腿長達44吋，難怪二人的經理人都說：「我哋公司個個女藝人都長腿o架啦！」
場地：嵐喬日本料理
攝：黎志輝
文：影視組