阿佘多人追 唐文龍拒勾前義嫂

佘詩曼表示冇留意「舊愛」鄭嘉穎與陳凱琳的新戀情。

由張智霖（Chilam）、阿佘、陳喬恩及薛家燕等，主演的《十月初五的月光》電影版昨假澳門舉行記招，吸引逾百傳媒採訪，場面熱鬧。由於鄭嘉穎與陳凱琳的新戀情炒得火熱，記者緊張追問阿佘反應，她笑言：「冇（留意）喎。（覺得佢哋相襯？）咁要睇相先知。」至於有指她與好友周家怡「爭仔」，齊向新加坡富商獻媚，阿佘即表示：「唔好破壞我哋姐妹感情，冇一齊去過新加坡，唔識邊個富商，我一頭霧水。（同周家怡taste一樣？）唔似喎。」

再會Chilam零尷尬

當記者再追問阿佘相隔15年，與曾傳緋聞的Chilam合作，會否感尷尬時，她淡然謂：「如果有就唔會接呢部戲，我哋有得選擇嘅。」而薛家燕與唐文龍隨後齊受訪，一向愛爆料的家燕姐又有新「貢獻」，她向唐文龍獻計謂：「其實你真係可以追阿佘喎，唔係，我覺得當年已經追過，睇大家眼神就知。」搞到唐文龍尷尬澄清﹕「冇呀，同佢咁多年朋友，佢大把人追。（做乜咁抗拒？）唔係抗拒，佢同我個friend拍過拖嘛。」

家燕姐踢爆唐文龍曾狂追阿佘，令唐即尷尬澄清。

Chilam笑言兩位女柏檔都鍾意，難以取捨。

陳喬恩晒背搶鏡

而Chilam則大讚戲中扮演啞巴的新拍檔陳喬恩，聰穎學手語快，女方則指男方吃了防腐劑，愈變愈帥！二人的感情線屬點到即止，問到Chilam最終會揀阿佘或喬恩？他打趣答：「兩個都鍾意。」4月4日生日的喬恩，前晚於拍攝現場獲導演葉念琛及Chilam捧出蛋榚為她補祝生日，令喬恩大為感動。

蕭定一（左二）率眾人舉杯預祝電影大賣。

陳喬恩大晒白滑玉背兼長腿搶鏡。