趙哲妤九龍塘徘徊 斷正速閃
前中國小姐趙哲妤（Uny）日前被本報拍得與緋聞富豪男友Jeff急急腳在尖沙咀「掃街」篤魚蛋兩份食，更做「柴可夫」駕車駛至有不少時鐘酒店的九龍塘，落車時被記者「斷正」，二人速逃到後巷，不見蹤影！
趙哲妤與緋聞富豪男友Jeff不時被影到行街食飯，雖然她沒有承認與Jeff是情侶關係，但Jeff亦曾到場撐Uny演舞台劇，又擔任其主持有線節目的嘉賓，關係浮面，但早前有傳好友鄭伊娜介入成為小三，姊妹反目，而Uny似乎想以行動證明與Jeff情不變。
落車時尷尬愕然
主持有線飲食節目《為食情報局》品嘗過不少美食的Uny，日前穿上短裙與Jeff現身尖沙咀，「掃街」篤魚蛋，更一碗小食兩份分，食得津津有味，旁若無人。二人醫飽肚後急急腳上車，由Uny駕車直駛九龍塘，在時鐘酒店附近徘徊約15分鐘，更小心翼翼落車視察環境，之後又停車在路邊談情，恰巧停在時鐘酒店附近！及後二人再次落車「搵路」時被記者發現，被撞破後二人表現尷尬及愕然，Uny更自言：「我哋兜錯路！」說畢二人速逃到後巷，不知所終。
之後記者致電給Uny，她澄清並非「開房」：「我去九龍塘綵排音樂劇，因為原本約咗朋友食飯，但趕住去綵排所以先去街邊篤魚蛋醫肚，唔係你哋所諗，我知綵排嗰度附近係有好多時鐘酒店，但係我綵排地方係喺後巷入面，大家唔好諗錯。」
鄭伊娜半個媒人
此外，曾被傳介入兩人關係的鄭伊娜受訪時直言與男方只是普通朋友：「恭喜佢哋！（冇酸？）冇酸過，我覺得可能係上次段新聞令佢哋兩個感情大增，我都算係半個媒人，到時佢哋結婚記得封大份啲利是畀我。」問兩人若拉埋天窗，會否出席其婚禮？她笑謂：「睇吓到時工作如何！」又謂現時忙於寫書和拍戲。談到揀男友，她表示自己相當謹慎：「但人哋點揀我就唔講喇！」
文：名人組