大細契想再會「鮑鮑」
李司棋、關菊英「大細契」及「鮑鮑」夏雨都是《溏心風暴》系列骨幹人物，常於劇中大鬥金句。對於梅小青有意再開拍以《溏心》班底為主的新劇，司棋姐說：「聽到呢個班底、又知出年開拍，當然想再合作。」
而關菊英則坦言之前與小青姐食過飯：「佢知我同無綫仲有幾個月約，所以冇傾拍劇嘅嘢。我當然希望同舊班底合作，但要等完約先。」此外，關菊英早前接受電台訪問時，談到將參與《顧嘉煇榮休盛典演唱會》，並提及當年在偶然機會下唱到《狂潮》：「有晚我瞓咗覺，無啦啦收到電話叫我即刻去錄音，原來煇哥佢哋趕住第二日交貨，錄完我就返屋企繼續瞓。」菊姐又大爆煇哥沉默寡言但脾氣很好。
