梅小青挖過檔 杏兒：合作到係好事

有指無綫兩大花旦胡杏兒、徐子珊約滿後有意外闖，成為各大電視台挖角對象。而電訊盈科旗下的香港電視娛樂（港娛）亦對杏兒、子珊虎視眈眈。自金牌製作人劉家豪及梅小青，於2012年離開無綫過檔nowTV任製作部總經理及副總經理，更「雙劍合璧」打造nowTV首部原創劇集《衛子夫》，甫首播即登上全國收視之冠。劉家豪更製作過不少家喻戶曉劇集，例如《溏心風暴》系列。據知，兩位正密鑼緊鼓籌備「港娛」開台作，預計以億元炮製民初劇《黃金風暴》，兼且有意翻炒《溏心》班底，找來已於去年12月與無綫解約的李司棋、夏雨、林峯，及合作過的杏兒、子珊打響頭炮！

翻炒《溏心》班底

據悉，《黃》劇為內地合拍劇，將於下年開拍。梅小青昨日透過電話表示心水人選是《溏心》班底：「同司棋姐、夏雨佢哋拍劇拍到好有感情，所以有把握。加上我又好鍾意用林峯，之前又同佢合作過《衛子夫》。」梅小青亦點名大讚近日與男友Philip Lee戀得高調的胡杏兒：「同佢合作過《秋香怒點唐伯虎》，佢係好演員，都想同佢合作。」

同是《溏心》班底的林峯，得知梅小青開新劇亦大感興趣，惜工作密麻麻的他應該未能參演：「好開心與小青姐多次合作，亦好樂意參演佢嘅新劇，但我擔心檔期未必演到。喺橫店拍劇到六月，之後又要到紐約為唱片錄音、拍MV，及為謝霆鋒拍飲食節目，忙到出年！」

梅小青有意搵來《溏心》班底再合作。

金牌製作人梅小青（右）及劉家豪，正密鑼緊鼓開拍開台劇。

子珊法拉再過招

而約滿在即並與無綫拉鋸中的杏兒，接受本報訪問時坦言合作是好事：「唔回應太多，好多謝小青姐同家豪哥賞識，同兩位合作學到好多嘢，合作到都係好事。」而早已放風想有新嘗試的子珊，昨日出席宣傳活動時大爆將以三點式上陣拍纖體廣告，並透過電話訪問坦言未完約，但希望同梅小青再合作：「小青姐佢哋冇聯絡到我，以前同兩位合作得好開心，不過我依家同無綫仲有一段時間嘅合約，希望將來有機會合作。」有指《溏心》班底之一的陳法拉將孭飛演出「港娛」新劇《舉世無雙》，所以亦有機會順理成章參演《黃》劇。

文：專案組

採：影視組