Ana R. 郭慶彬時裝界唔易撈
正所謂「異性相吸、同性相拒」，究竟一個型男遇上一個靚女，會產生甚麼化學花火呢？星級造型師郭慶彬（Ricky）遇上名模Ana R.，兩人不是談談情說說愛，而是說說時裝經！兩人不約而同謂時裝界表面風光，其實有苦自己知，無論捱餓還是生病都要頂硬上！
捐舊衫做慈善
R：郭慶彬 A：Ana R.
R：其實我都唔係太記得我哋係點認識。
A：你比較善忘，其實我哋經常喺活動撞到，加上有共同朋友，慢慢就熟起嚟，每次見面都講唔停。
R：我記得啦！我哋除咗講時裝經，仲會講心經，有時講到身邊人都插唔到嘴！
A：係呀！我同你除咗愛時裝，亦愛食點心。
R：我諗你細個又貪靚又貪食，哈……
A：其實貪靚就真，可能我媽咪係做裁縫師，我細細個就做佢個私家小model。
最叻針線
R：你咪遺傳到媽咪縫紉技術？
A：我係唔識用車衣機，哈……我由細聽車衣機聲大，車衣機聲對好多人嚟講好煩擾，但我就覺得有種安全感，會瞓得好冧；相反，我針黹就叻，從小好鍾意將舊衫或棄用物DIY。
R：好有意義，起碼係一種處理舊衫嘅好方法。
A：都係，起碼夠環保又慳錢；我仲會將部分舊衫捐出，幫助有需要嘅人。你都愛shopping，咁你又點處理啲舊衫？
R：有啲basic襟興款我唔會掉，當然會愈積愈多，屋企地方有限，最後惟有租倉放衫，有部分都會送畀朋友或捐出做慈善。
A：我都好愛shopping，所以我屋企訂造咗四個大衣櫃，因為我結婚搬新屋時計過，自己有逾半百對鞋同過半百個手袋。
R：嘩……你都好誇張，你點着得晒？你老公冇投訴咩？
A：我老公當然有投訴，佢鍾意買衫，但冇我咁瘋狂，佢只佔用衣櫃一小角嘅空間，儲存量係我十分一左右。
掉老公衫冇詐型
R：我諗你老公好愛你，仲可以容忍到你咁買法？
A：唔係晒命，佢真係好愛我，雖然投訴我買得瘋狂，但得把口，最終見我鍾意，佢都會送畀我，當然我都好愛佢。
R：咁都唔算晒命，哈……不過夫妻相處之道，係要包容同體諒。
A：其實我老公好寵我，好聽我話，唔係……應該話接受我意見，好似我哋結婚後搬新屋，我將佢50%衣服捐去做慈善，只有小量留低，根本好多都唔啱身，可以改都改咗！
R：你咁處置佢啲衫，佢有乜反應？
A：當然第一個反應好震驚，但都由得我，我有幫佢買過啲新衫o架！
R：雖然捐去做善事係有意義，但始終有啲衫係有珍藏價值，又或者自己好鍾意，根本唔捨得掉，如果問都冇問就掉咗，我一定發癲。
A：我真係冇問佢就掉喎！所以佢第一個反應咪好震驚囉！佢大部分衫唔係Hugo Boss，就係Paul Smith，款式根本out晒，又唔啱身。
R：你好彩唔係我另一半，否則我實殺死你，哈……
穿衣之道做自己！
R：你穿衣之道在乎邊方面？
A：我穿衣之道好簡單，我會留意潮流，但唔會跟足潮流，始終未必啱我自己，我最重要係着得舒服，就會着出自信。
R：我都覺得着衫應該有自己風格，唔應該做copy cat，否則會失去自我，嚴重會着得唔自在，因為唔係自己想要嘅效果。
A：一個人有自信，着乜都會好睇，有自己style。
R：當然啦！我穿衣之道除咗舒服外，仲要講求mix & match，我平、貴都會買，在乎點去配搭。
A：我着衫好睇心情，唔特定風格，有時會好girly、有時又會好boylish，甚至我仲可以rock得起添！
R：風格根本就唔應該有特定，隨心情去配搭反而係好事，起碼有份新鮮感。我覺得時裝可以好「fun」，應該放膽mix & match，當然唔好過咗火位啦！
忍痛行騷苦自知
A：好多人都誤解模特兒同形象指導工作好易做，錢又易賺，其實我哋事前做好多準備工夫，甚至客要求唔合理，都冇得say no，好似明明高跟鞋細咗吋半碼，都要強行着，忍痛行騷。
R：我絕對明白你感受，我哋做形象指導成日被誤解經常逛名店，求其借一兩套衫就完事，錢易賺，又着得光鮮。事實係錯，我同你一樣每接一份工作，事前要做好多工夫，好似我借衫會走遍各大名店，絕對唔係逛一間，由頭襯到落腳，所以首飾同高跟鞋配搭都唔可少，好多時連飯都冇時間食。
A：做模特兒都要保持體態美，除做運動，又要食得清淡，做騷時都係食蘋果頂肚，所以好多模特兒都有胃病，外間睇得我哋係表面風光。
突然暈低
R：我同你哋一樣成日捱肚餓，我一借衫可以由朝借到晚，有時忙到唔識餓，甚至餓到冇感覺，只係想快啲完成工作。到夜晚返到屋企真係超攰，就算有番肚餓感覺，但有時疲倦到寧願選擇瞓覺好過！
A：唔怪得你咁瘦！我以為你食唔肥咋！
R：我都唔想，我真係忙到唔好話食飯，連水都冇時間飲，我試過工作時喺後台差啲暈倒，眼前突然天旋地轉，我當時唔敢郁，好彩身邊有張櫈，我即刻坐低先冇仆倒，工作人員好緊張幫我搽白花油，最後我定一定神後，繼續做嘢，頂硬上！
最愛型格設計師
R：你最欣賞邊個設計師？
A：好多……例如Karl Lagerfeld、Diane Von Furstenburg，尤其係Stella McCartney我最欣賞，因為Stella本身係素食主義者，又愛護動物，佢設計可以做到任何皮毛製品都冇，真係好厲害。咁你呢？
R：我特別欣賞Alber Elbaz，因為覺得佢腦袋好犀利，同一款質感布料都可以縫製出唔同感覺嘅設計，剪裁立體得嚟又能凸顯女性優美身段，女性化得嚟好高貴。
A：我同你簡直係相逢恨晚，大家都有共同話題，可以講唔完！
R：應該話係惺惺相惜先啱，大家都愛時裝，當然趣味相投。
後記：雞啄唔斷 互笠高帽
跟Ana R.及Ricky各自訪問就做得多，約齊兩個都係第一次，兩個撞埋一齊就雞啄唔斷，簡直是插嘴都插唔入！鏡頭前兩人一本正經，估不到今次卻流露童真一面，細聲講大聲笑不特止，還要又跑又跳，就像活在自己的開心世界！兩人又愛互笠高帽，Ana R.讚Ricky為人友善：「佢好有自我風格同品味，而且作為星級形象指導又毫無架子，實在很難得！」Ricky也回敬Ana R.：「我欣賞你敬業同樂業，凡事都勇於嘗試，而且你作為名模，為人友善又helpful！」見兩人互笠高帽讚不停，身為小記的我都聽到毛管豎，只能贈送一句：「相逢恨晚吧！」
服飾、場地：Harvey Nichols
攝影：秦健輝