劉嘉玲 舒淇絕世腿功
早前舉行的香港電影導演會25周年銀禧晚宴暨年代頒獎典禮，當晚可謂星光熠熠，除一眾導演出席，還有一班影星包括影帝影后級人馬撐場。一眾女星衣着打扮依然不容有失，以示尊重場合的同時，亦可一晒自己的時尚穿衣品味。另一個於上海舉行的Vivia La China晚宴同樣衣香鬢影，女星們為搶鏡落足心思打扮。名模陳嘉容就大讚舒淇穿出漂亮女神感覺，劉嘉玲則美艷動人充滿女人味，凸顯修長美腿。
劉嘉玲
「美艷動人充滿女人味，着得好好睇，露長腿好吸引，對高踭鞋襯番條裙嘅Pattern，睇得到佢有花心思配襯過，髮型化妝都好Match。」
舒淇
「合格嘅漂亮女神Look，條裙好靚好啱佢Style，凸顯到佢對白滑美腿，髮型化妝都好襯，簡簡單單已經好靚。」
蔡卓妍 重塑腰形
「條裙好靚，不過腰身比較闊，顯得佢成個人得個瘦字，冇乜腰Shape，如果條裙貼身番啲，加番條Belt，會有番個腰形同埋整個線條會更修長，加番啲誇張款嘅金色、銀色Accessories，Total look會更Sharp、更靚。」
倪妮 花多眼亂
「條裙靚，可惜對高踭鞋襯得太絕，顯得有啲老土，手袋亦都完全唔襯。換對簡單款嘅白、金、銀或者紅色高踭鞋會靚好多，條裙已經好多Pattern，Accessories愈簡單愈好。」
田蕊妮 感覺過時
「有啲失手，件白恤衫加埋呢條腰帶感覺有啲過時，加番啲Rock味元素嘅Accessories與Ankle boots等，換條幼啲或者粗啲嘅Belt，成個Look會型好多。」
薛凱琪 全黑沉悶
「好似OL，一身打扮太斯文，條裙太普通，同埋佢襯晒黑色Accessories，咁嘅配搭好沉悶，如果襯番啲金色嘅Accessories，黑撞金會突出啲。」
王菀之 闊衫難Carry
「佢着到有啲大肚婆Feel，條裙本身靚，但咁闊嘅衫唔易Carry，可以加條Belt有番個腰形，同埋唔好着對Leggings，換對高踭Platform鞋會令對腳顯得長啲。」
Profile
香港著名模特兒陳嘉容（Eunis），曾為各大國際品牌行時裝騷，在時裝界打滾多年，不論時裝的理論還是實戰都難不倒她。近年Eunis更為電視時裝節目擔任主持，化身Stylist教人配襯衣着打扮。