任達華趕到謝票 觀眾爆粗讚
早前去了意大利拍戲的任達華（華哥），匆匆趕返港歸隊為電影《衝鋒車》謝票，但「宿敵」吳鎮宇卻未見現身，風趣的華哥即乘機進行「大報復」，直言最不滿意對方！談及曾為亞視拍劇，身家豐厚的華哥竟然萌生念頭，想購下當年自己的代表作作私人珍藏。
日前缺席英皇電影《衝鋒車》首映的華哥，被另一位男主角吳鎮宇揶揄：「歐遊大晒咩？」但查實當時華哥只是飛往意大利為新片《魔卡行動》開工。由於當地天氣放晴，華哥可以提早完成戲份，昨早他返抵香港，下午即趕往戲院會合姜皓文及譚耀文謝票。三位型男的出現令戲迷進入瘋狂狀態，當華哥問觀眾套戲好不好看時，有人對着他爆粗說：「你好X靚仔。」
分甘同味請食薄餅
華哥歸隊為電影謝票，他亦好識做帶來兩個薄餅與拍檔分甘同味，3人食得津津有味。談到意大利之行，華哥透露自己拍戲之餘亦乘機血拼：「本來諗住拍完戲會去英國度假，回心一諗都係飛返嚟謝票，不過返到嚟就唔見咗鎮宇喎，佢就真係『放假大晒咩』。（《衝》片首日收70餘萬票房滿唔滿意？）我最唔滿意係吳鎮宇啫。」阿譚及姜皓文異口同聲幫口謂：「問極鎮宇同佢經理人，都唔肯講去咗邊，覺得有啲嘢囉。（鎮宇話華哥多嘢講呀。）總好過啲人坐喺度唔出聲！」據悉，電影公司正計劃為《衝》片舉行慶功宴。
想買《勝者為王》
另外，華哥、阿譚及姜皓文分別曾為亞視拍劇。談到亞視即將「消失」，姜皓文坦言：「我對佢（亞視）死咗心好耐嘞，係戥班舊同事唔抵啫。」華哥則忽萌奇想謂：「我好鍾意自己套《勝者為王》，可唔可以買番嚟自己收藏呢？」
文：影視組