陳凱琳撐嘉穎唔花弗：人會變！

現年23歲的前港姐陳凱琳（Grace）與型佬鄭嘉穎，日前被《好報》拍得前後腳到男方位於大坑的寓所短聚近兩小時！事後嘉穎回應持開放態度：「任何嘢都由朋友開始！」似為戀情鋪路。

戀愛冇分年齡

昨日Grace、陳瀅、何雁詩、劉佩玥與數十名粉絲搞聚會，場面熱鬧。活動開始時，四女獻唱劇集《四個女仔三個BAR》主題曲，雖然Grace只拍手和唱，但High爆地與陳瀅起舞轉圈，春風滿面。Grace受訪時小心回答有關嘉穎的問題，似是有備而來：「我哋只係朋友，可能大家覺得拍劇就要傳緋聞。（嘉穎話年齡差距唔影響拍拖！）我都贊成，好多例子證明兩個人差距大少少，但關係都好好。（唔敢再上佢屋企？）暫時各有各忙，唔會喇！（下次約入戲院睇戲？）可能成班朋友睇戲都可以。（見面會尷尬？）仲有一齊拍劇，有講番件事，得啖笑。」

提到嘉穎過往緋聞多多，Grace不覺得對方花弗，更相信「人會變」，擺明給予對方甚高分數：「每個人過去都有啲感情，但唔會影響佢依家，人會變o架嘛！（有冇機會發展？）做住朋友先。（覺得呢個前輩點？）佢工作態度好，對工作人員、身邊人都好。（你鍾意咩男仔？）對朋友、家人好，但唔使諗咁多花巧嘢，識落一個人，就會發現佢某種性格好吸引。」問到派對上有否炸雞贊助？因嘉穎是炸雞店代言人，Grace即尷尬避談：「有人安排咗o架喇！一陣睇吓佢哋嗌咗咩食先。」

鄭嘉穎與陳凱琳因拍劇被指撻着。	陳凱琳與陳瀅興奮起舞轉圈。	何雁詩（左起）、陳瀅、劉佩玥及陳凱琳出席粉絲聚會。

陳瀅讚勁合襯

陳瀅表示未試過與Grace、嘉穎三人同場，故不覺兩人拍拖，但大讚他們靚仔靚女非常合襯，若真的戀愛，會送上祝福。提到陳瀅近期榮升宅男女神，她直言意想不到，問會否上載更多性感相到社交網吸粉絲？她說：「舒服就OK，唔會刻意性感。（性感尺度？）如果套戲係需要，都唔介意，但就三點不露。」

文：影視組