Kary紅館開騷要避孕
吳雨霏（Kary）昨日舉行新碟影相會，與一班粉絲玩「Selfie」，有歌迷送上印有偶像照片的薯片，亦有粉絲帶同小朋友到場，剛為人妻的Kary隨即母愛爆棚，不斷撩小朋友玩。
Kary表示新碟反應不錯，故舉行影相會答謝歌迷，問到可擔心有瘋狂粉絲太過熱情？她說：「我都想我啲歌迷熱情啲，佢哋好斯文，好有性格。反而內地歌迷可能少見，有時太熱情會抓到我。（抓到唔應該抓嘅地方？）好在冇，都OK。」她又透露與公司正計劃於明年舉行紅館演唱會，問到是否要小心避孕？她說：「如果真係，要囉，依家仲有幾個月畀我諗，順其自然啦。（大肚上台？）人命嘅嘢唔敢呀。」
有傳楊愛瑾快將與郭永淳拉埋天窗，問可會兩姊妹一起舉辦婚禮？Kary笑咪咪說：「等佢回應啦，如果佢真係結婚都戥佢開心，但未必一齊搞婚禮啦。我諗住自己婚禮去外地搞，雙方家長都想簡單為主，當係去旅行。」