佘詩曼教投資 最緊要計啱數
除了羅仲謙和楊怡投資磚頭外，不少圈中人對買樓投資亦有不少心得，藝人佘詩曼便是其中之一！她認為買樓投資會比較實在和穩陣，但必須計好條數：「要睇吓自己嘅負擔能力，又要睇吓租唔租得出，就算租得出都要注意可能個樓市會跌呀，租金又會跌呀，若果咁生活都能夠負擔得起，咁就可以買樓投資喇。」
而任達華雖然認為近兩年並不是買樓的好時機，自己亦不會在這段時間入貨，但他並不擔心羅仲謙和楊怡現時買樓，並大讚謙仔有「錢途」：「佢咁後生，又有前途，仲拍埋電影《西遊記之孫悟空三打白骨精》，不過我建議佢畀足六至七成首期，咁就算遇到要加息都唔使驚囉！（對樓市看法？）若果係自住就可以揀番啲偏遠地區，例如上水、元朗呢啲基建又好，入市門檻都低啲。」