天明要囡氹：再生揀性別
藝人洪天明昨日偕兒子洪大仁（TJ）出席活動，席間TJ不斷賣萌向天明獻吻，可愛又搶鏡！對於太太周家蔚5月生第二胎囝囝，天明覺得女兒比較孝順和黐家，故他不諱言想追多個女，並謂：「如果再生我會揀性別！」
洪天明與兒子洪大仁（TJ）、羅霖、文頌嫻、梁漢文、鄭欣宜及陳浩民夫婦等，昨日出席《「冰上動感 冰河世紀LIVE！香港站 長毛象大冒險」音樂劇》記者會，該冰上舞台劇將於7月23至26日在亞洲國際博覽館演出，香港乃今次世界巡迴演出的亞洲首站。
買定禮物氹囝囝
席間兩歲的TJ全程黐實天明，一時踎低玩紙碎，一時又搶咪大嗌「Happy Birthday」，更不停向爸爸送吻，Cute到爆！天明透露太太周家蔚預計5月初生第二胎，醫生指幼子比正常大兩周，夫婦倆暫時打算剖腹生產。擔心大仔呷醋的天明稱，近日不時買東西氹囝囝，又告訴他禮物是細佬買。他希望大仔做個好哥哥、不會教壞細佬。會否追個女？他說：「好想，因為女係冧啲，個仔大幾歲都唔睬我o架喇，女大啲都會拖手行街，個仔到十幾歲就會拖女友，唔再睬你，女會孝順啲、黐家啲。（考慮再生？）會考慮，但太太呢胎佗得辛苦，睇佢想唔想囉，如果再生我會揀性別。」
欣宜斥網友口多
欣宜提到吳若希鬧網友以其母開玩笑，她怒斥該網友：「黐線！夠啦！可唔可以對自己講嘅嘢負責！藝人都係人，作為藝人點笑我都冇所謂，但唔好搞我屋企人囉，好唔尊重，大家有啲口德啦。」
將於8月開騷的梁漢文，談到杜德偉個場接粉絲紅Bra，他笑言渴望歌迷掟Bra上台。同場的陳嘉佳（小寶）早前被攝影師寸遲到，小寶聲稱其母當日下午出事，即向劇組要求擇日再影，經商量後決定延至八點半，惟劇組未跟攝影師方面溝通。
文：影視組