顧嘉煇榮休騷 林子祥助陣
香港樂壇教父顧嘉煇榮休演唱會的十場門票火速全爆，演出的歌手陣容鼎盛，主辦商再爆殿堂級天王林子祥也會助陣，而煇哥的經典歌曲多不勝數，連帶寫樂譜、綵排時間的製作成本不斷上漲，但為賀煇哥榮休在所不計。
顧嘉煇一連十場《顧嘉煇榮休盛典演唱會》，參與演出的歌星陣容鼎盛，包括一眾殿堂級的天王天后如鄭少秋、汪明荃（阿姐）、葉麗儀、葉振棠等，據知繼天后容祖兒答應演出外，主辦單位新娛國際負責人丘亞葵（Vigo）昨日再爆林子祥（Lam）也會助陣：「其實仲有好多幕後音樂人如趙增熹、倫永亮、Eric Kwok都有份表演，好似趙增熹會同阿Lam同台演出表揚煇哥嘅作品。」
揀歌方面有難度
煇哥創作的經典作品多不勝數，Vigo承認揀歌方面都有難度：「個個都話想唱多幾首，我同仙杜拉喺長途電話傾，佢有少少投訴我大細超，因為佢想唱其他歌手嘅歌，但我話佢一定要唱《啼笑因緣》同《風雲》，佢仲想唱多兩首，但因時間所限，我都要再睇吓安唔安排到。」Vigo表示因煇哥經典作品太多，單是寫樂譜、綵排時間的製作成本不斷上漲：「但我在所不計，總之要做到最好！」
考慮再加一兩場
煇哥的榮休演唱會一票難求，十場門票早已火速售罄，內銷的貴飛超額五千張，Vigo說：「我唔敢再接任何訂飛要求，我仲要Cut飛。」他也考慮過再加一至兩場，但要視乎紅館檔期，也要跟煇哥商量，他說：「要得煇哥同表演歌手同意先考慮。」Vigo對於演唱會如此賣座，既開心又鬆一口氣，他說：「最初煇哥覺得開六場已足夠，但我同班歌手、樂迷都想藉住今次榮休演唱會，送一份難忘回憶畀煇哥，感謝佢對香港樂壇嘅付出，就提議佢做多幾場，所以好有壓力，如今賣座成績咁好我都好安心，總算對煇哥有交代。」下月中旬表演隊便會全面投入排練，他會親自監製製作事宜。
文：音樂組