琦琦傳授模術一殼眼淚
名模琦琦首度參演的大陸真人騷周六首播即贏得收視冠軍，節目中她做回自己，擔任名模導師，扭盡六壬教授7女模，琦琦說從未試過在人前落淚，但在節目中她由頭喊到尾，喊到最後叫攝影師不要再拍她。
琦琦有份參演的大陸模特兒真人騷《愛上超模》，夥拍中國著名舞蹈家金星一同擔任星級導師，琦琦和金星各自帶領一隊女模，兩人在節目中決戰連場，鬥靚鬥智，甚有火花，外景由大陸拍到澳洲，相處長達兩個月，兩人因此變成好友，琦琦更坦言當初是因為金星才決定參演：「好耐之前已經認識金星，但唔熟，今次第一次同佢合作好愉快，係互相欣賞，佢係一個好爽快嘅人，睇好多書，好有內涵，同佢好夾。」
掛住囡囡變空中飛人
琦琦透露真人騷拍攝時間很長，由去年聖誕開鏡至近日才完成，她續說：「聽朋友話有好多個收視第一，唔知真定假，呢兩個月都拍得好辛苦，之前感冒未好，咳唔停，澳洲啲陽光好猛，要喺澳洲啲莊園拍外景，鼻和耳仔都曬燶咗，而且要離開屋企好耐，好唔捨得個女，一有三日假期就飛返香港見個女。不過自己未做過幕後，第一次拍真人騷，希望擴闊人生，（聽講你好感動？）第一次喺鏡頭前喊囉，成日畀啲隊員講嘅說話搞喊，喊咗好多次，我叫攝影師唔好再影我喊，好肉酸。」可謂拍出琦琦最真實的一面。
劇組欲邀任達華添食
由於收視理想，節目總監隨即力邀琦琦與任達華夫妻檔拍新一輯真人騷，實行添食，但仍未能夾得檔期。節目中，琦琦組的7位參賽女模，包括有本身是超模的康倩（Ki Ki）及兩位來自四川的性感姑娘，還有一位女模更被指貌似內地男星王寶強；至於金星組的參賽者則包括一位大碼模特兒及一位聾啞女模。
文：名人組