古仔谷戲 挑戰！拿捏！巨星！
古天樂昨日在影視展連走三場，忙到喘不過氣的他心情大靚，期間更聯同任達華大玩食字粗口，又整蠱司儀重複朗讀，惹笑非常。之後古仔在另一活動中透露戲中大量動作戲均親身上陣，既要以開山刀劈面，又要在紅隧飛車撞雙層巴士，險象環生，笑指保險公司下次應拒絕受保。
忙於內地拍攝電影的古天樂難得在港，昨日先出席電影《殺破狼II》及《迷城》記招，而身為第三十九屆香港國際電影節大使的他，傍晚時分出席電影節開幕電影首映禮，忙得不可開交的他卻心情大靚。
華哥「吊」埋一份
《殺》片記招上，古仔聯同任達華、吳京、泰國打星Tony Jaa及監製葉偉信出席，起初大會以「挑」字形容電影是個挑戰，貪玩的古仔大玩食字粗口，以「拿」及「星」來形容新片，引來哄堂大笑：「電影要『拿』捏得好準，而電影就粒粒巨『星』。」還着司儀照讀一次。華哥見狀亦加入戰團，以「吊」字形容電影說：「因為拍攝嗰時吊威吔『吊』了十幾日。」
吳京則透露拍攝時受傷不斷，當中一場更差點死掉：「講我逃獄由三樓跳落去，一個重五十公斤嘅篋差啲打中塊面，好在及時避到，雙腳膝頭都有受傷，拍完之後就做手術。」已為人父的他坦言現時責任感重，不會像以往般搏到盡，會做足安全措施，太太更曾寄語他「命是用來拚，不是用來搏」。
唔回應張栢芝
及後古仔再與電影《迷城》演員余文樂、台灣男星張孝全、任達華、謝天華、李璨琛等為影片造勢，三片在手的古仔又投資食肆及電影，想做電影大亨？古仔故作神秘說：「電影以外嘅嘢唔回應。（有指導演林嶺東出名要求高？）佢都唔係出面講到咁冇人性，拍動作係好危險，好似要用開山刀劈面，但拍順咗又冇嘢，只係用力劈都有殺傷力，又試過喺紅隧飛車撞雙層巴士，都親自上陣。（有否加大保險額？）林導冇拍戲一排，保險公司不知情況下受保，之後相信會拒絕。」
對於張栢芝被踢出《3D封神榜》片劇組，古仔已從報紙上獲悉，問到栢芝有否失場？古仔說：「其他演員嘅嘢唔回應，拍戲我一個人拍。（冇對手？）其他人都回應晒，我冇回應。（佢唔滿意你紅過佢！）唔回應。」余文樂指林導在家閉關寫劇本，故未有到場：「佢唔係大家講到咁恐怖，都好細心同情感豐富，試過半夜打嚟傾偈，之後都會再合作。」
文：影視組