吳若希獲老闆傍實 鍾嘉欣酸爆
「女神」吳若希（Jinny）與鍾嘉欣兩位「星夢」歌手前晚出席活動，穿上露背裝的Jinny獲老闆何哲圖（Herman）全程傍實兼孖住受訪，果然「愈Hit愈愛」，曾是Herman愛將的嘉欣即時被打入冷宮，難怪失寵的嘉欣回應時句句有骨說：「我一直唔係佢女神。」
近日成為「東網Baby」的吳若希（Jinny）、鍾嘉欣、佘詩曼、薛凱琪、張敬軒、鍾欣潼、王祖藍及梁烈唯等前晚出席「微博之星2014頒獎禮」，雖然Jinny與嘉欣同屬「星夢娛樂」歌手，但兩人同場未有打招呼，身為星夢揸Fit人的何哲圖（Herman）陪住Jinny到場，更全天候守在「女神」旁，連Jinny接受訪問他都企在身邊搭訕，縱然嘉欣在附近接受電子傳媒訪問，Herman卻全程黐住Jinny，明顯冷落嘉欣BB。
嘉欣暗怨遲出碟
已有年多沒出唱片的嘉欣透露開始錄音，相信今年有望出新碟，記者笑她已被Herman踢出女神之位，失寵的她有骨地說：「我一直都唔係佢女神，只係好乖嘅囡囡。」隨即直指Herman因迷信令她去年未有「發市」：「佢好迷信，話今年先適合我出碟，我一向都唔迷信，希望年年可以出碟，但每個人睇法唔同，我好就得人。」
對於無綫將力捧陳凱琳、蔡思貝和劉佩玥，嘉欣說：「每年都有新人，無綫當年都畀機會我拍劇，如果唔係今日唔會有人識我。（後浪勁有壓力？）我哋都唔輸蝕，同埋唔可以斷層，明白公司策略。」
吳若希唱功獲讚
而身穿露背裝的Jinny憑「洗腦歌」《越難越愛》奪「微博給力電視劇歌曲」，她說：「自己都好Surprise，完全諗唔到，新一年又派咗新歌《美好的時光》，證明呢首歌有持久力，仲係戰鬥力超強。」並透露11月將出新專輯，身旁的Herman讚Jinny唱功。對於嘉欣今年都出新碟，問Jinny擔不擔心資源被分薄？她說：「唔驚，公司係大公司，同埋老闆好公平。」
文：音樂組