Stephy瞓身飛撲 組索爆女排

歌手鄧麗欣(Stephy)為圓心願出錢出力當排球隊「Loey」班主,成功招攬一班索模靚女變身排球女將出賽,過去周日首度出戰雖敗陣而回,但Stephy的「球花長腿陣」已觸動一眾宅男神經,前晚Stephy急不及待與隊員練波,飛撲又翻觔斗接波毫不錫身!

身為班主兼Loey隊長的鄧麗欣(Stephy)前晚相約隊員到運動場繼續練波,十多個女仔先跑圈再做「大字形」拉筋動作,31歲的Stephy身體柔軟度及體力比年輕隊友絕不遜色。雖然記者在場,但教練未有錫住Stephy,反而點名要她單獨接波,在分幾鐘內教練狂向左右兩邊發球,令Stephy要連環左右撲,更要插水式翻觔斗接波,不愧是當年港青排球隊名將,就算撞到膝頭紅腫都照樣奮不顧身。

宅男(目及)實長腿

正如Stephy所言,Loey有多名「球花」,當中身材高挑的連詩雅師妹Inez和現職Mandy Lieu旗下的Joe都是標致Model,而Lelia和Cindy亦屬甜美型,加埋女神Stephy這個「球花長腿陣」可以說「冇得輸」。可封香港最索女排?Stephy笑言:「咁我又冇見晒其他隊,就算唔係『最』……都係之一嘅!嗰日比賽有好多宅男喺側邊虎視眈眈,望住我哋隊員啲長腿。」Stephy選着「5」號球衣,她稱當年打波都是5號,是她Lucky Number。

Stephy稱去年十月構思到成事只是短短幾個月,全靠教練網上召集一班熱愛排球的女孩:「啲女仔初頭唔知有我,所以當見到我時仲驚係電視台拍整蠱節目。」

直指小方妒忌

球花眾多,可禁男友方力申來捧場?Stephy笑言:「又冇,但我都冇去睇佢打籃球,反而唔敢要求佢嚟睇,等比賽先啦。」小方對Stephy打排球可有意見?她笑道:「佢好妒忌我,點解佢打籃球冇上C1,我答佢因為冇美腿囉。」

文:音樂組