舒淇冇期拍 不便評芝

藝人舒淇、湯唯、任達華、蔡卓妍及鄭伊健等昨晚出席「香港電影導演會25周年銀禧晚宴暨年度頒獎禮」，舒淇在晚宴上被問到張栢芝被前經理人陳嵐飛出新片一事，她說：「冇合作過，唔方便評論。」她承認當日因檔期問題未能接拍《3D》。問到是否鬆一口氣，她即謂：「唔好咁講！佢係好演員，以前都好鍾意佢。」她透露農曆年間去了日本旅行，笑言「應該去的人都有去。」問到是否以「緋聞男友」來形容馮德倫關係，她說：「一直都係你哋講。私人嘢唔講嘞！」