Lea T.奢華狂歡 比堅尼回禮
霍啟山前緋聞女友，混血模特兒Lea T.，去年夏天認識了一位富豪，早前更獲邀到加勒比海參加對方的包島生日Party，還出動私人飛機包接送，認真架勢。在當地常以比堅尼上陣的Lea，盡情玩樂歎美食，享受奢華愉快假期。
混血模特兒Lea T.，樣靚身材正自然不乏追求者。去年夏天她就認識了一位歐洲富豪朋友，雖然Lea表示兩人只屬好友關係，亦不知對方是否有意追求，但早前就獲對方邀請到加勒比海參加包島生日Party。對方還出動私人飛機包接送，讓她享受豪華愉快假期。
不排除發展可能
Lea坦言：「今次係我好朋友邀請我去加勒比海嘅Bransons Island Necker同埋Mosquito，包島開生日Party慶祝佢生日，成個旅程玩咗十日，之後我就趕返香港工作。（朋友私家島？）個島其實係屬於一家航空公司嘅老闆，租用嘅都係要有頭有面。朋友係歐洲人，白手興家，我無過問佢做咩生意。（對方發動追求攻勢？）我唔知，我哋只係好朋友，不過咩都有可能發生。（被佢打動？）我好感恩可以認識到佢，可以喺佢身上學到好多嘢。」
吊索滑翔兼衝浪
在當地幾乎日日都以比堅尼上陣的Lea，笑謂：「每日都有唔同嘅Artist為我哋表演，同埋有唔同嘅廚師為我哋炮製美食。其中一晚我哋着到好似電影《大亨小傳》咁去參加晚宴。另外又有一日喺船上，享用一枱嘅日本刺身壽司。我仲玩咗吊索滑翔，同埋好多水上活動包括噴射衝浪，好慶幸無見到鯊魚。」
文：外娛組