栢芝疑失控捱轟遭永不錄用

藝人張栢芝自2012年拍畢《危險關係》後，鮮有再拍新片！闊別影壇將近三年的她，最近參與明年賀歲片《3D封神榜》拍攝，並反串飾演哪吒，與李連杰、梁家輝、古天樂、黃曉明及舒淇等合作。據知栢芝為拍攝此片吊足十多小時威吔，導致雙腳布滿瘀血要放血，甚至以輪椅代步！然而，栢芝卻因被指工作態度差、扮大牌及失場等罪名，而被踢出新片！

畀機會冇珍惜

栢芝前經理人兼《3D封神榜》電影公司老闆之一陳嵐，接受本報訪問時聲音沙啞，並承認栢芝被飛：「我會尊重公司永不錄用嘅決定，呢件事我好心痛，我信錯人，畀咗機會佢冇好好珍惜。」她謂當初安排栢芝飾演哪吒，身邊已有反對聲音，惟她被栢芝感動：「佢同我講『我會改過之前唔好嘅嘢，會做好自己』。」更揚言不收片酬！不過一向疼錫栢芝的她，仍照封利是予栢芝，更根據栢芝的幸運號碼定下銀碼211萬！不過栢芝收下利是後，以與舊公司有合約糾紛為由，拒簽合約及收據。

自言為栢芝多次痛心落淚的陳嵐續稱：「栢芝新年前突然飛去北京話試造型，我仲怪製片係咪通知錯咗。新年後我就搵唔到佢，佢冇聽我電話。」她謂栢芝曾因不滿拍攝次序怒轟製片：「有次古天樂同黃曉明拍先，栢芝唔鍾意就爆粗鬧製片，佢哋大晒？我冇收片酬，係咪要拍我先？栢芝仲傳短訊畀我老公話，你哋契仔（黃曉明）牛逼（巴閉）啦！老公以為讚緊曉明，仲覆『你都好牛逼』。」

文章頂替演出

陳嵐又爆栢芝以往的扮大牌事迹：「拍陳勳奇套《楊門女將之軍令如山》時，同片嘅劉曉慶都埋晒位，但佢匿喺房唔出嚟，導演打畀我求救，我再打畀栢芝佢都唔聽，但就衝去鬧導演做咩搵我壓佢！」劉曉慶數天前偶遇陳嵐時亦不禁向她投訴：「栢芝這樣的工作態度是不行的！」如今栢芝失場，陳嵐找來原先屬意的內地演員文章頂替：「起初文章檔期撞咗拍唔到，但我哋動畫同細節做遲咗，所以依家佢拍到！」與栢芝合作多年的陳嵐，被問到有否忠告給予栢芝時，她語重心長地說：「佢依家嘅情緒應該去睇醫生！（會唔會再接栢芝電話？）我諗佢唔會打畀我！」 而對於被前經理人的炮轟，栢芝在本報截稿前仍未有回覆。

文：專案組

採：影視組