陳凱琳被力捧孭飛拍《巨輪2》

無綫將於4月26日推出黃金時段新陣勢，三大高層包括集團行政總裁助理杜之克、戲劇製作總監曾勵珍及非戲劇製作總監余詠珊昨舉行《4.26華麗轉身》記者會公布詳情。期間談及有報道指無綫鬧花旦荒，珍姐即表示：「咁講永遠都係唔夠，不過都有唔少積極嘅新人，好似陳凱琳、蔡思貝及劉佩玥咁吖，好啱做呢行，又勤力資質又高。陳凱琳第1次試鏡，已經覺得佢好熟手，嚟緊喺《張保仔》內佢又打又吊威吔，好搏命。」

蔡思貝孖陳豪拍劇

劇悉，無綫將有連串計劃力捧三小花。陳凱琳將於7月夥拍蕭正楠及田蕊妮等，開拍王心慰監製的《巨輪2》，屆時大隊將往日本及澳門等地取景，而其出演的角色性格特別，應該很有發揮。至於刻下正接拍張家輝新片的蔡思貝，則於5月夥拍陳豪開劇，詳情暫未有定案，她昨接受訪問表示：「好多謝珍姐讚我，自己亦會努力，每次睇番自己嘅演出，都覺得仲有進步空間。」劉佩玥稍後亦會夥拍朱千雪演出林志華監製新劇《EU超時任務》，戲中將扮演一名思想單純的模特兒。

珍姐讚余詠珊言和

另外，剛宣布全權掌管戲劇科的曾勵珍，記者會上主動澄清與余詠珊權鬥傳聞，且表示：「係我邀請佢（余詠珊）幫我包裝劇集嘅。」在旁的余詠珊聞言即打趣：「我鬥輸咗嘛。」曾勵珍揚言十分滿意余詠珊包裝外購劇《武則天》的效果，又同時否認會腰斬《愛‧回家》：「收視企穩喺24點，不過係有構思緊新劇種。」而杜之克則揚言日後翡翠台將致力播放本地製作及劇集以取悅觀眾。

文﹕影視組