子丹Hero夢：拍勵志片

「宇宙最強」甄子丹拍過的電影可謂不計其數，如《葉問》、《黃飛鴻二之男兒當自強》、《戰狼傳說》、《一個人的武林》、《特殊身份》、《最強囍事》、《家有囍事2009》、《八星抱喜》等等，當中包括不同的題材，更有子丹自編自導的、擔任動作設計的、監製等，可以說多年來，子丹對於電影的幕前幕後都貢獻良多。問拍過多個不同題材電影的子丹，若然要再開拍電影，最想拍甚麼？他腦海中已經有大量概念：「我最想拍的是勵志片。」

子丹更在太太汪詩詩的鼓勵下開設名為Super Hero的製作公司：「佢想我咁做，因為佢覺得，你（子丹）有咁多年經驗，喺幕後又咁多年，一直都咁多諗法，應該發展落去，培育新人，所以應該開間公司。」為何當初會採用這個名字？子丹自豪表示：「畀人第一個感覺好勁，因為我拍嘅戲同角色都係圍繞住英雄、大俠，但我想講開Super Hero嘅目的，我認為喺電影呢個行業，每個崗位都係hero（英雄），一個攝影師、燈光師，佢哋都係令電影成功嘅其中一分子，大家都係hero。」

子丹一家四口新年時到馬爾代夫度歲。	由子丹監製的廣告，與太太汪詩詩齊齊演出。	甄子丹若放下嚴肅的一面，喜劇細胞自會流露。

有喜劇細胞

對於動作片與喜劇兩種截然不同的電影類型，子丹都能揮灑自如，他謙虛表示：「我都只係做好演員部分，大家都知我係武術家，其實我都可以有好多面、唔同興趣及性格。我鍾意講吓笑，又好玩得，我覺得每個人都有喜劇細胞。」外表給人有點嚴肅的子丹，原來在私底下都愛講笑話逗家人開心。

「打吡大使」甄子丹坐着寶馬現身《寶馬香港打吡大賽》。	子丹曾拍攝電影《西遊記之大鬧天宮》，為演孫悟空而黐到成身毛。	在子丹眼中，太太和一對仔女位置非常重要。

子丹在電影上除了充當動作設計外，亦會參與美術指導的工作，無論導演、美指、製作等瓣瓣掂，於家庭上亦如是，對子女保護有加的子丹表示不會讓家人一齊演出：「我冇諗過一家人一齊演出，小朋友仲細，我個女（甄濟如）11歲、仔（甄濟嘉）7歲，佢哋想嘅未必啱。不過佢哋都對藝術音樂有興趣，好似個女對唱歌跳舞有天分，個仔則對唱歌功夫有天分，而我同詩詩都好支持。」

52歲未言休

現年52歲的子丹，退休之路可謂離他甚遠，自問對這行有很多想法、理想的他直言即使不演出幕前，仍會繼續擔任導演的工作。而工作忙碌的他會否也想多抽空陪家人呢？他說：「抽多啲時間陪屋企人係我嘅目標，除咗工作，重要嘅係小朋友嘅將來，同埋一家人點樣過，係我哋最重要嘅目標。一個好簡單嘅約會，可能一家人去BBQ都係我嘅大目標，我覺得大目標係唔等於錢同size。」

另外，子丹對於衣着都有個人的審美觀，他介紹道：「武打片嘅服裝好複雜，同寫實片唔同，寫實片不過就係jacket、牛仔褲，每個人都可以接觸到；但係武打片，好多時候牽涉不同類型，可以神話武打片、武俠武打片、漫畫武打片，好似《龍虎門》啲衫胸前黐兩粒星，拍《西遊記之大鬧天宮》，我做孫悟空全身黐晒毛、着晒鎧甲，反而仲複雜。」

貪靚係美德

每次出席活動子丹都用心打扮，每次均奪目有型，對此，子丹表示對於衣着自己一直都有自己諗法：「我同太太好心有靈犀，我哋會睇天氣、心情、event揀衫，有時會一齊揀中同一隻顏色，好似佢着黑色，我又着咗黑色，大家撞衫，就變咗情侶裝。」問子丹是否屬於貪靚一族？他笑言：「貪靚係一種美德，唔通着到邋邋遢遢？貪靚同乾淨係一種審美眼光。我覺得男士着得乾淨，尊重場合係好緊要。我哋做娛樂圈要見人，同fashion接觸多咗，都會學到嘢。」

擁有145磅體重，讓男人羨慕、女人叫囂的完美身形，還以為子丹對於食會非常講究，但他說：「我食嘢唔講究，我鍾意食嘅會食好多，屬於比較放縱。不過就因為好忙，所以好少同太太下廚煮食。」

英姿颯颯

第三度擔任「打吡大使」的甄子丹早前出席《寶馬香港打吡大賽》，講到馬，子丹表示首部接觸馬的電影是《七劍》：「好多年前未騎過馬，所以有恐懼感，唔係驚有意外，係怕影響表現同水準，亦真係試過發生意外，依家諗起都驚驚地。我拍嘅武打片，所演嘅都係武功高強、策騎起嚟又好有型，揸住把劍好英姿颯颯嘅角色。」

造型：Harrylam

髮型：Kenji Ng @ il Colpo

化妝：Annie G. Chan

服裝：Ted Baker

攝影：張福宏

採訪：許詠妍