許廷鏗 林欣彤 唔怕比較 互撐追夢
「千金易得，知己難求」，但許廷鏗（Alfred）與林欣彤（Mag）絕對是圈中難得的一對知己，Mag曾飽受過情緒困擾，有一段長時間消失於幕前，她透露其後之所以能鼓起勇氣重新投入工作，原來背後功臣就是Alfred！而知己除了會互相扶持、一同以歌聲向樂迷傳遞夢想外，亦少不免會「互窒」對方，特別是提到兩人身形上的大逆轉！
許：許廷鏗 林：林欣彤
肥瘦逆轉 健康要緊
一度消瘦的林欣彤自認肥了不少，她又憶述許廷鏗初出道時好瘦，慶幸現在肥瘦輪流轉，令二人望落均勻不少，而許廷鏗聞言立即來個大反擊！
林：初初你就好瘦，我就包包臉，咁依家呢就有少少均勻咗，逆轉咗，不過你都係偏向……嗰面。
許：偏向靚嗰面呀！你偏向醜嗰面。
林：係偏向親和力強嗰面！
許：即係嗰種福氣係流於表面嘅。
林：我肥咗好多，我之前係好唔想肥，因為有一個人喺我隔籬，一上鏡嗰時，嘩！真係要提一提，咁我就唔想步佢後塵，因為我以前塊面真係好鬼包。
許：你唔係講緊我嘛？
林：我講緊你，因為周圍所有人都講緊呢樣嘢！不過我又唔知點解有啲鍾意肥肥哋，講真，因為我又試過肥又試過瘦，但我可以話畀你聽圓潤啲係OK嘅，但唔好「太」囉！
許：係呀，我嘅理念都係一樣，真正嘅身心健康就唔等如瘦，其實大家依家都仲係隔住個Mon，如果真人見到我哋，其實係同正常人唔係太大分別啫，不過呢個圈定正常嘅位係定得比較瘦嘅！
黑暗過後 總有曙光
走過低谷的林欣彤再次踏上舞台面對觀眾難免感到緊張，幸好當時有知己許廷鏗在場給予力量，令她信心大增！
林：我係一個好靠身邊嘅愛去行路嘅人，當我發現屋企人有事，我就想唔行落去喇，搵唔到繼續奮鬥嘅理由，有一段時間我就匿埋咗啦，有時都有同你見面嘅，有一次你叫我出番嚟，去唱一個《勁歌金曲》總選嘅performance，我其實本身諗住唔做。
許：因為你嗰時聲音嘅狀態同個人都未ready再出番嚟，你都唔係有諗過，直頭講埋出口。
林：你就話當同你唱番首歌，咁啱嗰首歌係《I'll be there》，有一句歌詞呼應到嘅，就係「Just call my name,I'll be there」，嗰時我好乏力，就係呢一句說話令我好似不倒翁咁暫時充番氣先。
許：嗰時你好耐冇出鏡，啲觀眾見到你就「嘩！瘦咗咁多嘅！」同埋我好記得喺台底未升上去嘅時候你已經好驚，見到你咁我就拖住咗你隻手嘅，我唔記得講咗句咩，好簡單但好緊要嘅，類似係「一齊去做啦！」之後我哋一升上去，真係開始唱喇，大家都係一路拖住，同埋互相畀緊力量對方。
老友鬼鬼 無懼流言
林欣彤與許廷鏗一同透過歌唱比賽出道，因此不時被人作出比較，但感情要好的二人並不在意，只希望在音樂路上繼續努力！
許：好得意嘅一樣嘢就係，不論我哋互相去望到大家光芒嘅時候，其實唔係一個比對嘅心態嚟。
林：我哋係一齊愈照愈光！
許：有時會發現唔係我哋自己好想去比較，但可能傳媒又或者大家嘅歌迷好容易將同一代嘅人分割咗，就算我哋真係幾好朋友、幾唔計較都好，佢哋都會將我哋去做比較，可能佢唱先、佢唱後呢啲咁。
林：不過呢啲嘢我冇擔心過喎！
許：呢啲嘢唔係我哋要擔心嘅類別嚟，但好老實講，影響一定有，但我哋甚少畀呢啲說話影響到。
林：我完全冇，好老實。
許：我哋嘅樂迷都可能接受咗，或者見到我哋嗰種Friend嘅程度都好難有假嘅時候，就冇呢啲比較嘅消息出現，其實係難得嘅，我到依家呢一刻都仲覺得我哋嚟緊係會一齊再衝！
影響愈深 使命愈大
對音樂執着的許廷鏗和林欣彤坦言在台上演唱外，亦要了解歌曲背後的意義，抒發自己的夢想，從而影響歌迷，傳達使命感。
許：嗰時覺得你每次上台都好有理念，其實我之後點解會做《青春頌》、《重新長大》呢啲歌，唔多唔少都係因為我記得你喺台上面講你嘅夢想，我覺得好有說服力嘅，亦都覺得原來做一個歌手唔淨係參賽唱好隻歌就等如完成件事，而係音樂入面有啲咩想抒發。
林：因為嗰時我覺得我哋係人辦嚟，好多人差一個chance，慢慢我就諗要喺個台度做啲咩呢，除咗要唱好每一首歌、企上個台多謝身邊嘅人成就咗我之外，我發現當你成為一個公眾人物後，一啲同你唔識嘅人都完全可以畀你影響，慢慢有一班fans，原本我每做一樣嘢係會完全影響到佢哋，所以我就諗我要做一個有用啲嘅人！
許：慢慢我亦都好似你所講，有一堆樂迷原來係會遵從自己嘅理念。由一開始嘅《螞蟻》大家可能會覺得我係唱情歌，後來啲歌轉向講多啲我自身嘅嘢後，啲歌迷都會同我分享佢哋嘅夢想，原來呢樣嘢係一股勢力，所以我覺得可以自誇啲講句，成為新生代嘅歌手慢慢會多咗少少使命感！
後記：為食口多多
Alfred和Mag人前人後都friend過夾band，而且很多時候看法都非常一致，其中最合拍的必定是二人同樣有「為食」的基因，在訪問期間抵受不住美食的誘惑，光明正大地吃酒店準備的食物，不過小記非常欣賞他們自然流露的真性情，更希望他們不要為了配合圈中瘦的標準而磨滅了一顆愛吃的心！
服裝：2068TwentySixtyEight
髮型：Ritz@Hair Corner
化妝：Mag Lam
場地：都會海逸酒店
攝：李柏儒
文：戴菲亞