狄高達莊遜完美膊出位
歐美舉行各大時裝周，正是名人紅星展現個人時裝品味的季節，時尚氣息特別濃郁。雖然天氣仍然寒冷，但愛美的女星們都寧願捱凍，以最美、最性感的姿態示人。時裝作家Janice Wong最欣賞憑情色電影《格雷的50道色戒》升呢的荷里活女星狄高達莊遜（Dakota Johnson），以全黑pantsuit造型現身，大讚膊頭靚，還有身形比例剛剛好，着出清爽感覺。
狄高達莊遜 The Best
「好好睇，佢夠高，係品牌bar jacket重新設計嘅作品，剪裁性感，將佢個靚肩膊完美展現出嚟；黑色pantsuit隨時着得古老，但佢身形比例啱啱好，唔會着得腳短之餘，仲着出清爽感覺。」
劉嘉玲 降落傘質感
「清新綠色，演繹得好高貴，條裙質地好特別，似降落傘嘅質感，帶sporty味道。嘉玲一向着衫好有品味，不過條裙令佢顯得豐滿咗，如果條裙短些少更好。」
Solange Knowles 斗篷有睇頭
「幾型，係歐美嘅型格。黑白色造出簡單而強烈對比效果，上衣剪裁好特別，有啲斗篷嘅剪裁，已經夠晒睇頭，所以加唔加頸鏈都冇所謂。」
Kim Kardashian 網透性感
「好性感，出席時裝騷不妨性感一點。魚網裙野性又搶眼，係外國人喜愛嘅穿衣風格，上身同下身雖然都係透視，但pattern唔同，質料同圖案嘅對比造出有趣效果，就係時裝追求嘅東西。」
張鈞甯 褲管扣分
「都OK，係女強人下班後去cocktail嘅造型，睇得出佢花過心思打扮，配飾啱啱好，戴咗對長耳環，感覺一絲不苟，唯一美中不足係褲管寬鬆，顯得有啲piggy。」
宋慧喬 裙簡潔欠星味
「略為平淡，好有鄰家女孩feel。雖然去時裝騷唔使過分隆重，但條裙就過於簡潔，幸好佢係宋慧喬，否則就似普通入場欣賞show嘅觀眾，凸顯唔到星味。」
Profile
王麗儀（Janice Wong），時裝作家，16年前華語媒體中首位遠赴歐美時裝周報道的時裝編輯，經常為香港及海外的時裝設計比賽擔任評判，連美國CNN旗下亞洲生活時尚網站及香港Yahoo也分別讚譽她為「香港首位真正的時裝權威」及「時裝文化人」。